ന്യൂഡല്‍ഹി: റഫേല്‍ കരാറുമായി ബന്ധപ്പെട്ട രേഖകള്‍ വെളിപ്പെടുത്തിയത് പൊതുജന താല്‍പര്യാര്‍ഥമാണെന്ന് 'ദ ഹിന്ദു' പബ്ലിഷിങ് ഗ്രൂപ്പ് ചെയര്‍മാന്‍ എന്‍. റാം. ഇത് മാധ്യമങ്ങളുടെ ധര്‍മ്മമാണെന്നും, തങ്ങള്‍ക്ക് വിവരങ്ങള്‍ ലഭിച്ച സ്രോതസ് പുറത്തുവിടാന്‍ ഉദ്ദേശിക്കുന്നില്ലെന്നും എന്‍. റാം വ്യക്തമാക്കി.

റഫാല്‍ കരാറുമായി ബന്ധപ്പെട്ട് കേന്ദ്ര സര്‍ക്കാരിനെയും പ്രധാനമന്ത്രി നരേന്ദ്ര മോദിയെയും പ്രതിക്കൂട്ടിലാക്കുന്ന റിപ്പോര്‍ട്ട് ദ ഹിന്ദു പ്രസിദ്ധീകരിച്ചിരുന്നു. ഇതിനെതിരെ കേസെടുക്കുമെന്ന് സര്‍ക്കാര്‍ സുപ്രിംകോടതിയില്‍ അറിയിക്കുകയും ചെയ്തിരുന്നു. ഇതിനു പിന്നാലെയാണ് എന്‍. റാമിന്റെ പ്രതികരണം.

'ആര്‍ക്കും ഞങ്ങളില്‍ നിന്ന് ഒരു വിവരവും ലഭിക്കാന്‍ പോകുന്നില്ല. പക്ഷെ ഈ രേഖകളും അവയെ അടിസ്ഥാനമാക്കിയുള്ള ഞങ്ങളുടെ റിപ്പോര്‍ട്ടുകളും സ്വയം സംസാരിക്കുന്നുണ്ട്. ഞങ്ങള്‍ എന്താണോ പ്രസിദ്ധീകരിച്ചത് അത് പ്രസിദ്ധീകരിച്ചത് തന്നെയാണ്'- അദ്ദേഹം പറഞ്ഞു. എന്നാല്‍ സുപ്രിം കോടതി നടപടികള്‍ സംബന്ധിച്ച് സംസാരിക്കാന്‍ എന്‍. റാം തയ്യാറായില്ല.