പുത്തനത്താണി: പൊന്മുണ്ടം പഞ്ചായത്തിലെ ആദൃശ്ശേരി എല്‍.പി സ്‌കൂളിന് സമീപം കാര്യത്തറ കോളനിയില്‍ വീടുകളിലേക്ക് തുടര്‍ച്ചയായ മഴയില്‍ വെള്ളം കയറി. ഇതോടെ ഇവിടെയുള്ളവരുടെ ജീവിതം ദുരിതത്തിലായി. പകര്‍ച്ച വ്യാധി ഭീഷണിയിലാണ് കോളനിക്കാരായവരും പരിസര പ്രദേശത്തുള്ളവരും.
വെള്ളപ്പൊക്കം മൂലം വീടുകളില്‍ നിന്നു പുറത്തിറങ്ങുന്നതിന് പലരും പ്രയാസപ്പെടുകയാണ്. സുരക്ഷിത സ്ഥലങ്ങളിലേക്ക് ഇവരെ അടിയന്തിരമായി മാറ്റി താമസിപ്പിക്കേണ്ടതാണ്. അതോടൊപ്പം തന്നെ തോടിന്റെ പാര്‍ശ്വഭിത്തി നിര്‍മാണം പാതി വഴിയില്‍ നിര്‍ത്തിയതാണ് വെള്ളക്കെട്ടിന് കാരണമാക്കിയതെന്ന് ആരോപണമുയര്‍ന്നിട്ടുണ്ട്.