ജിദ്ദ: എണ്ണ ഉല്‍പാദനം ഉയര്‍ത്തണമെന്നും എണ്ണവില നിയന്ത്രിക്കണമെന്നും പ്രമുഖ ഉപഭോക്താക്കളുടെ ആവശ്യത്തിനിടെ ഒപെക് നിര്‍ണായക യോഗം ഇന്ന്. ഇന്നും നാളെയുമായി ആസ്‌ത്രേലിയയാണ് യോഗം ചേരുന്നത്. ഉല്‍പാദനം വര്‍ധിപ്പിക്കാന്‍ ഇന്നത്തെ യോഗത്തില്‍ ധാരണയാകുമെന്ന പ്രതീക്ഷയിലാണ് ലോകം.

കഴിഞ്ഞ മാസങ്ങളില്‍ എണ്ണ ഉല്‍പാദക രാഷ്ട്രങ്ങളുടെ കൂട്ടായ്മയായ ഒപെകും റഷ്യയടക്കമുള്ള രാജ്യങ്ങളും ഉല്‍പാദന നിയന്ത്രണം ശക്തമാക്കിയിരുന്നു. ഇതോടെ എണ്‍പത് ഡോളര്‍ വരെയെത്തി എണ്ണയുടെ വില. ഗള്‍ഫില്‍  പ്രതീക്ഷ ഉയര്‍ത്തിയയെങ്കിലും ഇന്ത്യയടക്കമുള്ള ഉപഭോക്തൃ രാജ്യങ്ങളില്‍ ഇത് വിലക്കയറ്റം രൂക്ഷമാക്കി.

ഉല്‍പാദനം വര്‍ധിപ്പിക്കണമെന്ന അഭിപ്രായത്തോട് ഒപെക് ഇതര എണ്ണ ഉല്‍പാദക രാജ്യങ്ങളിലെ പ്രധാനിയായ റഷ്യ യോജിക്കുന്നുണ്ട്. സഊദി അറേബ്യയ്ക്കും അനുകൂലനിലപാടാണ്. എന്നാല്‍ മറ്റ് ഒപെക് രാജ്യങ്ങള്‍ക്കിടയില്‍ ഭിന്നാഭിപ്രായമാണുള്ളത്. ഒപെക്, ഒപെക് ഇതര എണ്ണ ഉല്‍പാദക രാജ്യങ്ങള്‍ ചേര്‍ന്നു പ്രതിദിനം 15 ലക്ഷം ബാരല്‍ ഉല്‍പാദനം വര്‍ധിപ്പിക്കണമെന്നാണു റഷ്യയുടെ നിര്‍ദേശം.

ഉല്‍പാദന നിയന്ത്രണത്തില്‍ ഭാവി കാര്യങ്ങള്‍ തീരുമാനിക്കാനാണ് യോഗം ചേരുന്നത്. വില 80 ഡോളര്‍ തൊട്ടതോടെ ഉല്‍പാദനം കൂട്ടുമെന്ന പ്രതീക്ഷയിലായിരുന്നു ഉപഭോക്തൃ രാജ്യങ്ങള്‍. വില സ്ഥിരത ഇല്ലാത്ത സാഹചര്യത്തില്‍ ഒപെക് തീരുമാനം എന്താകുമെന്ന് ഉറ്റു നോക്കുകയാണ് ഉല്‍പാദക രാഷ്ട്രങ്ങളും.