ജിദ്ദ: കൊവിഡ് പശ്ചാത്തലത്തിൽ വിമാന യാത്രക്ക് നിരോധനം ഏര്‍പ്പെടുത്തിയതോടെ ഇന്ത്യയിൽ കുടുങ്ങിയ ആരോഗ്യ പ്രവര്‍ത്തകരുടെ ആദ്യ സംഘം ഈ ആഴ്ച സഊദിയിലെത്തും. കേരളത്തിലുളളവര്‍ കൊച്ചി വിമാനത്താവളത്തില്‍ നിന്നു റിയാദിലെത്തുക.

വാര്‍ഷിക അവധിയില്‍ പോയി മടങ്ങി വരാന്‍ കഴിയാത്ത സഊദി ആരോഗ്യ മന്ത്രാലയത്തിന് കീഴില്‍ ജോലി ചെയ്യുന്ന ഇന്ത്യക്കാരെ മടക്കി കൊണ്ടുവരാനുളള നടപടി ഒരു മാസമായി ദല്‍ഹിയിലെ ഹെല്‍ത്ത് എംപ്‌ളോയ്‌മെന്റ് ഓഫീസ് തുടങ്ങിയിരുന്നു. തെരഞ്ഞെടുത്ത 1,931 പേരുടെ പട്ടിക പ്രസിദ്ധീകരിക്കുകയും ചെയ്തിരുന്നു. ഇവരെയാണ് മടക്കികൊണ്ടുവരുന്നത്.

മെയ് 13ന് ആദ്യ ബാച്ചും 16ന് രണ്ടാമത്തെ ബാച്ചും ഇന്ത്യയില്‍ നിന്നു സഊദിയിലെത്തും. ഇതിനുളള ഒരുക്കങ്ങളാണ് നടക്കുന്നത്. യാത്ര സംബന്ധിച്ച് ജീവനക്കാര്‍ക്ക് ഇ മെയില്‍ സന്ദേശം നല്‍കി. തിയതിയില്‍ മാറ്റം ഉണ്ടായാല്‍ അറിയിക്കുമെന്നും സന്ദേശത്തിലുണ്ട്.

റീ എന്‍ട്രി വിസയില്‍ ഇന്ത്യയില്‍ അവധിയിലുളള സഊദി ആരോഗ്യ മന്ത്രാലയത്തിന് കീഴില്‍ വിവിധ ആശുപത്രികളില്‍ ജോലിചെയ്യുന്നവരെയാണ് മടക്കി കൊണ്ടുവരുന്നത്. കൊച്ചിയില്‍ നിന്നു പുറപ്പെടുന്ന സഊദി എയര്‍ലൈന്‍സിന്റെ പ്രത്യേക വിമാനം ദക്ഷിണേന്ത്യയിലെ മറ്റെരു സംസ്ഥാനത്തു നിന്നുകൂടി ജീവനക്കാരെ കയറ്റാനാണ് സാധ്യത.