ഇസ്‌ലാമാബാദ്: പാകിസ്താനില്‍ ന്യൂനപക്ഷവിഭാഗമായ ഹിന്ദുക്കളെ 'പശുമൂത്രം കുടിക്കുന്നവര്‍'എന്നുവിശേഷിപ്പിച്ച തഹ്‌രീകെ ഇന്‍സാഫ് പാര്‍ട്ടി (പി.ടി.ഐ) നേതാവും മുന്‍ മന്ത്രിയുമായ ഫയാസുല്‍ ഹസന്‍ ചൗഹാന്റെ നടപടിയെച്ചൊല്ലി പഞ്ചാബ് അസംബ്ലിയില്‍ ബഹളം.
പ്രസ്താവനയില്‍ പ്രതിഷേധിച്ച് പഞ്ചാബ് മന്ത്രിമാര്‍ സഭ ബഹിഷ്‌കരിച്ച് ഇറങ്ങിപ്പോയി. പാകിസ്താനിലെ ഹിന്ദുക്കളെ അവഹേളിക്കലാണ് ഫയാസിന്റെ പ്രസ്താവനയെന്ന് പാക് മുസ്‌ലിംലീഗ് (നവാസ് വിഭാഗം) നേതാവ് ഖലീല്‍ താഹിര്‍ അഭിപ്രായപ്പെട്ടു. പാകിസ്താന്‍ ഒരു യുദ്ധഭീഷണി അഭിമുഖീകരിക്കുമ്പോള്‍ രാജ്യത്തെ ഭിന്നിപ്പിക്കാനാണ് ചില മന്ത്രിമാര്‍ ശ്രമിക്കുന്നതെന്ന് അദ്ദേഹം ആരോപിച്ചു. പാക് ഹിന്ദുക്കളുടെ രാജ്യസ്‌നേഹത്തില്‍ അഭിമാനമുണ്ടെന്ന് പി.ടി.ഐ നേതാവ് കൂടിയായ പ്രോസിക്യൂഷന്‍ മന്ത്രി ചൗധരി സഹീര്‍ പറഞ്ഞു.
ഫയാസിനു പകരമായി സയ്യിദ് സുംസം ആലി ബുഖാരി പുതിയ സാംസ്‌കാരിക മന്ത്രിയായി അധികാരമേറ്റു. പഞ്ചാബ് ഗവര്‍ണര്‍ ചൗധരി മുഹമ്മദ് സര്‍വാര്‍ അദ്ദേഹത്തിന് സത്യപ്രതിജ്ഞ ചൊല്ലിക്കൊടുത്തു. കഴിഞ്ഞദിവസമായിരുന്നു ഫയാസിന്റെ വിവാദ പ്രസ്താവന. പ്രതിഷേധം രൂക്ഷമായതോടെ പഞ്ചാബ് മുഖ്യമന്ത്രി അദ്ദേഹത്തിന്റെ രാജിയാവശ്യപ്പെടുകയായിരുന്നു.
ഫയാസിനെ പുറത്താക്കാന്‍ നിര്‍ദേശം നല്‍കിയ പ്രധാനമന്ത്രി ഇമ്രാന്‍ ഖാന്റെ നടപടിയെ രാജ്യത്തെ ആദ്യ ദലിത് വനിതാ എം.പിയും പാകിസ്താന്‍ പീപ്പിള്‍സ് പാര്‍ട്ടി നേതാവുമായ കൃഷ്ണകുമാര്‍ കോഹ്ലി സ്വാഗതം ചെയ്തു. പാകിസ്താന്‍ സമാധാനം ആഗ്രഹിക്കുന്ന രാജ്യമാണെന്ന് ലോകത്തിനു മുന്നില്‍ കാണിച്ചുകൊടുക്കുമ്പോഴാണ് മന്ത്രി വിവാദ പ്രസ്താവന നടത്തിയതെന്നും അവര്‍ കൂട്ടിച്ചേര്‍ത്തു.