ഗൂഡല്ലൂര്‍: കഴിഞ്ഞ ദിവസം പെയ്ത ശക്തമായ കാറ്റിലും മഴയിലും നിരവധി വീടുകളുടെ മേല്‍ക്കൂര തകര്‍ന്നു. ഊട്ടിക്കടുത്ത ടി.ആര്‍.ബസാറില്‍ മഴക്കൊപ്പം വീശിയടിച്ച കാറ്റില്‍ 16ഓളം വീടുകളുടെ മേല്‍ക്കുരകള്‍ തകര്‍ന്നു.
നിരവധി വീടുകളുടെ ഭിത്തികള്‍ക്കും കേടുപാടുകള്‍ സംഭവിച്ചിട്ടുണ്ട്. മേല്‍ക്കൂര മേഞ്ഞിരുന്ന തകര ഷീറ്റുകളും ഓടുകളുമാണ് കാറ്റില്‍ നിലംപൊത്തിയത്. കാറ്റ് ശക്തമായതോടെ വീടുകളില്‍ നിന്ന് ആളുകള്‍ പുറത്തിറങ്ങിയത് അപകടം ഒഴിവാക്കി. കഴിഞ്ഞ ദിവസം ശക്തമായ മഴയാണ് നീലഗിരി ജില്ലയുടെ പലഭാഗങ്ങളിലും ലഭിച്ചത്.
 മഴയിലും കാറ്റിലും നിരവധി കര്‍ഷകരുടെ കൃഷികളും നശിച്ചിട്ടുണ്ട്. വാഴക്കൃഷിയാണ് ഏറെ നശിച്ചത്. കുലച്ചതും കുലക്കാറായതുമായ ആയിരക്കണക്കിന് വാഴകളാണ് ശക്തമായ കാറ്റില്‍ നിലം പൊത്തിയത്.