കൊല്ലം: ജില്ലയുടെ പല ഭാഗങ്ങളിലും കഴിഞ്ഞ രാത്രിയുണ്ടായ വേനല്‍മഴയിലും കനത്ത കാറ്റിലും നാശനഷ്ടത്തിനിരയായവര്‍ക്ക് മതിയായ നഷ്ടപരിഹാരം നല്‍കാന്‍ അടിയന്തിര നടപടി സ്വീകരിക്കണമെന്ന് സി.പി.ഐ ജില്ലാസെക്രട്ടറി എന്‍ അനിരുദ്ധന്‍ ആവശ്യപ്പെട്ടു. കുണ്ടറയിലെ പെരിനാട്ടും സമീപപ്രദേശങ്ങളിലും വന്‍നാശനഷ്ടമാണ് സംഭവിച്ചത്. പിറവന്തൂര്‍, തഴുത്തല, അഞ്ചല്‍ തുടങ്ങി പല ഭാഗങ്ങളിലും വ്യാപകമായി നാശം സംഭവിച്ചിട്ടുണ്ട്. നൂറുകണക്കിന് വീടുകള്‍ തകര്‍ന്നു.
ആയിരക്കണക്കിന് മരങ്ങള്‍ പിഴുതുവീണിട്ടുണ്ട്. മരങ്ങള്‍ വീണാണ് പല വീടുകള്‍ക്കും നാശം സംഭവിച്ചത്. വമ്പിച്ച കൃഷിനാശവും ഉണ്ടായി. നഷ്ടപ്പെട്ട വൈദ്യുതിബന്ധം പുനസ്ഥാപിക്കാനും മറ്റ് പുനരധിവാസ പ്രവര്‍ത്തനങ്ങള്‍ നടത്താനും യുദ്ധകാലാടിസ്ഥാനത്തില്‍ നടപടിയുണ്ടാകണം. നാശനഷ്ടങ്ങള്‍ എത്രയും വേഗം തിട്ടപ്പെടുത്തി സഹായനടപടികള്‍ സ്വീകരിക്കാന്‍ അധികൃതര്‍ തയാറാകണമെന്നും അദ്ദേഹം അഭ്യര്‍ഥിച്ചു.