പയ്യോളി: മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയിലെ ഡാറ്റ എന്‍ട്രി ഓപ്പറേറ്ററായി തിക്കോടി പഞ്ചായത്തില്‍ ജോലി ചെയ്യുന്ന എം.പി ഷീബയുടെ ജോലി കരാര്‍ പുതുക്കുന്നതുമായി ബന്ധപ്പെട്ട വിഷയത്തില്‍ തിക്കോടി പഞ്ചായത്ത് ഭരണസമിതിയില്‍ തര്‍ക്കം.
കഴിഞ്ഞ വര്‍ഷവും ഷീബയുടെ കരാര്‍ പുതുക്കുന്ന വിഷയം ഭരണസമിതിയില്‍ ചര്‍ച്ചക്കെടുത്തപ്പോഴും വാക്കേറ്റമുണ്ടാവുകയും ഒടുവില്‍ കരാര്‍ പുതുക്കാന്‍ തീരുമാനിക്കുകയുമായിരുന്നു.
കഴിഞ്ഞ പതിനൊന്ന് വര്‍ഷമായി ഷീബ തിക്കോടി പഞ്ചായത്തില്‍ ജോലി ചെയ്യുന്നുണ്ട്. ഇതിനാല്‍ ഇവരെ അകാരണമായി പിരിച്ചുവിടുന്നത് ശരിയല്ലെന്നാണ് ഭൂരിപക്ഷ ത്തിന്റെയും അഭിപ്രായം. കഴിഞ്ഞ രണ്ട് ഭരണസമിതി യോഗങ്ങളിലും ഷീബയുടെ വിഷയം അജന്‍ഡയില്‍ ഉള്‍പ്പെടുത്തിയെങ്കിലും ചര്‍ച്ചക്കെടുക്കാതെ മാറ്റിവയ്ക്കുകയായിരുന്നു.
അതേസമയം ഷീബയുടെ വിഷയത്തില്‍ വിട്ടുവീഴ്ച ചെയ്യേണ്ടെന്ന നിലപാടാണ് കോണ്‍ഗ്രസ് സ്വീകരിച്ചിട്ടുള്ളത്. കഴിഞ്ഞ വര്‍ഷവും ഇതേ നിലപാട് തന്നെയായിരുന്നു കോണ്‍ഗ്രസിന്. എന്നാല്‍ പഞ്ചായത്ത് പ്രസിഡന്റ് അടക്കമുള്ള മുസ്‌ലിം ലീഗ് അംഗങ്ങള്‍ മാനുഷിക പരിഗണന നല്‍കണമെന്ന നിലപാട് എടുക്കുകയായിരുന്നു. ഇതേതുടര്‍ന്നാണ് കരാര്‍ പുതുക്കിയത്. യു.ഡി.എഫിലെ കരാര്‍ പ്രകാരം പ്രസിഡന്റിന്റെ കാലാവധി അവസാനിക്കാനിരിക്കെയാണ് ഷീബയുടെ വിഷയം ഭരണസമിതിക്ക് മുന്‍പാകെ വീണ്ടും എത്തുന്നത്.