തിരുവനന്തപുരം: കേരളത്തില്‍ ഇത്തവണ വേനല്‍മഴ അധികം ലഭിച്ചു. മാര്‍ച്ച് ഒന്നു മുതല്‍ ഈ മാസം 11 വരെയുള്ള കാലാവസ്ഥാ നിരീക്ഷണകേന്ദ്രത്തിന്റെ കണക്കനുസരിച്ച് സാധാരണയെക്കാള്‍  ഒന്‍പത് ശതമാനം അധികമഴയാണ്  ലഭിച്ചത്. 

സാധാരണ ഈ കാലയളവില്‍ 195.3 മില്ലിമീറ്റര്‍ മഴയാണ് കേരളത്തില്‍ ലഭിക്കേണ്ടത്. ഇക്കുറി 213 മി.മീ ലഭിച്ചിട്ടുണ്ട്. തിരുവനന്തപുരം, പത്തനംതിട്ട, കോട്ടയം, എറണാകുളം, വയനാട്,കോഴിക്കോട് ജില്ലകളിലാണ് അധികമഴ ലഭിച്ചത്. കോട്ടയത്ത് 56 ശതമാനവും പത്തനംതിട്ടയില്‍ 54 ശതമാനവും തിരുവനന്തപുരത്ത് 36 ശതമാനവും വയനാട്ടില്‍ 42 ശതമാനവും എറണാകുളത്ത് 43 ശതമാനവും അധികമഴ ലഭിച്ചു. കോഴിക്കോട്ട് രണ്ടു ശതമാനം അധികമഴയാണ് ലഭിച്ചത്. എന്നാല്‍ ഇടുക്കിയില്‍ സാധാരണ ലഭിക്കുന്ന അളവിലേ മഴ ലഭിച്ചിട്ടുള്ളൂ. 

വേനല്‍മഴ ഏറ്റവും കുറഞ്ഞത് കാസര്‍കോട് ജില്ലയിലാണ്. ഇവിടെ സാധാരണ ലഭിക്കേണ്ടതിനേക്കാള്‍ 51 ശതമാനം മഴക്കുറവാണ് രേഖപ്പെടുത്തിയത്. ആലപ്പുഴയില്‍ 17 ശതമാനവും കണ്ണൂരില്‍ 13 ശതമാനവും കൊല്ലത്ത് 20 ശതമാനവും മലപ്പുത്ത് 17 ശതമാനവും പാലക്കാട്ട് 14 ശതമാനവും തൃശൂരില്‍ 15 ശതമാനവും മഴക്കുറവ് രേഖപ്പെടുത്തി. 

സംസ്ഥാനത്ത് വേനല്‍മഴ  തുടരുമെന്ന് കാലാവസ്ഥാ നിരീക്ഷണകേന്ദ്രം അറിയിച്ചു. വെള്ളിയാഴ്ച കോട്ടയം, ഇടുക്കി, വയനാട് ജില്ലകളിലും ശനിയാഴ്ച മലപ്പുറം, കോഴിക്കോട്, കണ്ണൂര്‍ ജില്ലകളിലും ശക്തമായ മഴയ്ക്കുള്ള യെല്ലോ അലര്‍ട്ട് നല്‍കിയിട്ടുണ്ട്.