ന്യൂഡല്‍ഹി: ഇന്ത്യന്‍ ഗുസ്തി താരം ബബിത കുമാരിയുടെ ഒളിംപിക് പങ്കാളിത്തം അനിശ്ചിതത്വത്തില്‍. ഏഷ്യന്‍ ഒളിംപിക് യോഗ്യതാ മത്സരത്തില്‍ മംഗോളിയയുടെ സുമിയ എര്‍ദെനെച്ചിമെഗിനോട് ബബിത പരാജയപ്പെട്ടിരുന്നു. പിന്നീട് സുമിയ ഉത്തേജക പരിശോധനയില്‍ പരാജയപ്പെട്ടതോടെയാണ് ബബിതയ്ക്ക് ഒളിംപിക് യോഗ്യത സ്വന്തമായത്. എന്നാല്‍ കഴിഞ്ഞ ദിവസം നടന്ന വാഡയുടെ പരിശോധനയില്‍ കുറ്റക്കാരിയല്ലെന്ന് കണ്ടെത്തിയതിനെ തുടര്‍ന്ന് സുമിയക്ക് ഒളിംപിക് യോഗ്യത തിരികെ ലഭിച്ചു. ഇതോടെയാണ് ബബിതയുടെ പങ്കാളിത്തം അനിശ്ചിതത്വത്തിലായത്. 

യുനൈറ്റഡ് വേള്‍ഡ് റെസ്‌ലിങ് അസോസിയേഷന്‍ സുമിയക്ക് 53 കിലോ വിഭാഗത്തിലാണ് ഒളിംപിക് ക്വാട്ട അനുവദിച്ചത്. ഇതോടെ സ്വാഭാവികമായും ബബിത യോഗ്യതയ്ക്കു പുറത്തുപോവേണ്ടി വരും. എന്നാല്‍ ഇക്കാര്യത്തില്‍ അസോസിയേഷന്‍ വ്യക്തത വരുത്തിയിട്ടില്ല. ഇന്ത്യന്‍ റെസ്‌ലിങ് ഫെഡറേഷനും ഇക്കാര്യത്തില്‍ ആശങ്കയറിച്ചിട്ടുണ്ട്. ബബിതയ്ക്ക് യോഗ്യത നഷ്ടമായാല്‍ അത് ഇന്ത്യയുടെ മെഡല്‍ സ്വപ്നങ്ങള്‍ക്ക് കനത്ത തിരിച്ചടിയാവും