മലപ്പുറം: പത്തനംതിട്ടയില്‍ നിന്ന് കാണാതായ ജെസ്‌നയെ മലപ്പുറത്തെ കോട്ടക്കുന്ന് പാര്‍ക്കില്‍ കണ്ടെന്ന വിവരത്തെ തുടര്‍ന്ന് പൊലിസ് വീണ്ടും പാര്‍ക്കിലെത്തി അന്വേഷണം തുടങ്ങി.

പാര്‍ക്കിലെ സി.സി.ടി.വി ദൃശ്യങ്ങള്‍ വീണ്ടെടുക്കാനാണ് പൊലിസിന്റെ ശ്രമം. ദൃശ്യങ്ങളടങ്ങിയ ഹാര്‍ഡ് ഡിസ്‌ക് പരിശോധനയ്ക്ക് അയക്കും. മലപ്പുറം ടൗണിലെ സി.സി.ടി.വി ദൃശ്യങ്ങളും പരിശോധിക്കുമെന്ന് വെച്ചൂച്ചിറ എസ് ഐ ദിനേശ് കുമാര്‍ പറഞ്ഞു.

ജെസ്‌നയോട് രൂപസാദൃശ്യമുള്ള പെണ്‍കുട്ടിയെ മറ്റൊരു പെണ്‍കുട്ടിക്കൊപ്പം കണ്ടതായി മലപ്പുറത്തെ ചിത്രകാരനായ ജസ്‌വീറാണ് പൊലിസിനെ അറിയിച്ചത്.
കഴിഞ്ഞ 3 നാണ് പെണ്‍കുട്ടിയെ കോട്ടക്കുന്നില്‍ കണ്ടത്. രണ്ട് മണിക്കൂറോളം കോട്ടക്കുന്നില്‍ ചെലവഴിച്ചാണ് ഇവര്‍ മടങ്ങിയത്. അപ്പോഴെടുത്ത സെല്‍ഫിയില്‍ ഒരു പെണ്‍കുട്ടിയുടെ മുഖം പതിഞ്ഞിട്ടുണ്ട്. ഇതാണ് സംശയത്തിന് ആക്കംകൂട്ടിയത്. ഈ ചിത്രം പൊലിസിന് കൈമാറിയിട്ടുണ്ട്.