സ്വന്തം ലേഖകന്‍

കണ്ണൂര്‍: കൊവിഡ് പശ്ചാതലത്തില്‍ പ്രവാസികളെ നാട്ടിലെത്തിക്കാന്‍ ഗള്‍ഫില്‍നിന്നു കണ്ണൂരിലേക്കു കൂടുതല്‍ വിമാന സര്‍വിസ്. 

എയര്‍ഇന്ത്യ എക്‌സ്പ്രസിന്റെ പ്രത്യേക വിമാനമാണു കുവൈത്ത്, മസ്‌കത്ത്, അബുദാബി എന്നിവിടങ്ങളില്‍നിന്നു യഥാക്രമം 19, 22, 23 തിയതികളില്‍ കണ്ണൂരിലേക്കു സര്‍വിസ് നടത്തുക. 

19നു രാവിലെ 10.55ന് കണ്ണൂരില്‍നിന്നു തിരിക്കുന്ന വിമാനം പ്രാദേശിക സമയം ഉച്ചയ്ക്കു 01.10ന് കുവൈത്തിലെത്തും. 02.10ന് പുറപ്പെട്ട് രാത്രി 09.10ന് കണ്ണൂരിലെത്തും. 

22നു രാവിലെ 11.30ന് കണ്ണൂരില്‍നിന്നു പുറപ്പെട്ട് ഒമാന്‍ സമയം ഉച്ചയ്ക്കു 01.45ന് മസ്‌കത്തിലെത്തുന്ന വിമാനം 02.45ന് യാത്രക്കാരുമായി പുറപ്പെട്ട് രാത്രി എട്ടിന് ഇവിടെയെത്തും. 

23നു രാവിലെ 11ന് കണ്ണൂരില്‍നിന്നു പുറപ്പെട്ട് യു.എ.ഇ സമയം ഉച്ചയ്ക്ക് 01.30ന് അബുദാബിയില്‍ എത്തുന്ന വിമാനം പ്രാദേശിക സമയം ഉച്ചയ്ക്കു 02.30ന് പുറപ്പെട്ട് രാത്രി എട്ടിന് കണ്ണൂരില്‍ എത്തിച്ചേരും. 180 യാത്രക്കാര്‍ വീതമാണു വിമാനത്തില്‍ ഉണ്ടാവുക. 

20നു റിയാദില്‍നിന്നു കണ്ണൂരിലേക്ക് എയര്‍ ഇന്ത്യയും പ്രത്യേക വിമാന സര്‍വിസ് നടത്തുന്നുണ്ട്. മുംബൈയില്‍നിന്നു തിരിക്കുന്ന വിമാനം റിയാദിലെത്തി യാത്രക്കാരുമായി കണ്ണൂരിലെത്തും.