കല്ലറ: മദ്യലഹരിയിലെത്തിയ സംഘം ഓട്ടോ ഡ്രൈവറെ ക്രൂരമായി മര്‍ദിച്ച് അവശനാക്കിയ സംഭവത്തിലെ അഞ്ച് പേരെ പോലീസ് അറസ്റ്റു ചെയ്തു.
കുട വെച്ചൂര്‍തേങ്ങാകൂട്ടിറ ശരത് (32), പെരുംതുരുത്ത് പുത്തന്‍പുരയ്ക്കല്‍ ലിബിന്‍ (25), വെച്ചൂര്‍ ഉഴത്തില്‍ ശരത് (32), വെച്ചൂര്‍ മൂന്നുവേലിത്തറ ഫിജിന്‍ (22), കൊടുത്തുരുത്ത് മറ്റത്തില്‍ വിനോദ് (28) എന്നിവരെയാണ് കടുത്തുരുത്തി പോലീസ് എസ് എച്ച് ഒ കെ.പി തോംസണ്‍ അറസ്റ്റു ചെയ്തത്.കല്ലറ സ്റ്റാന്റിലെ ഓട്ടോ ഡ്രൈവര്‍ തുണ്ടത്തിപ്പറമ്പില്‍ അനീഷ് (30) നാണ് മര്‍ദനമേറ്റത്. അനീഷ് കുറവിലങ്ങാട് ഗവണ്‍മെന്റ് ആശുപത്രിയില്‍ ചികിത്സയിലാണ്.
വ്യാഴാഴ്ച വൈകിട്ട് 6.15 ഓടെ കല്ലറ സ്റ്റാന്റില്‍ ഓട്ടോയില്‍ ഇരിക്കുകയായിരുന്ന അനീഷിനെ അഞ്ചംഗ സംഘം ഓട്ടോയില്‍ നിന്ന് വലിച്ചിറക്കി മര്‍ദിക്കുകയായിരുന്നു എന്ന് പരാതിയില്‍ പറയുന്നു. അനീഷിനെ നീണ്ടൂരുള്ള ബാറിലേക്ക് ഓട്ടം വിളിച്ചു കൊണ്ട് പോയ ശേഷം ഇവര്‍ മദ്യപിക്കാനായി ബാറില്‍ കയറി.
ഏറെ നേരം കഴിഞ്ഞിട്ടും കാണാതായതോടെ അനീഷ് തിരിച്ച് കല്ലറയിലേക്ക് പോരുകയായിരുന്നു. ഇവരെ അനീഷ് കാത്ത് നില്‍ക്കാതിരുന്നതിനാല്‍ മദ്യപിച്ച് തിരികെയെത്തിയ സംഘം മദ്യലഹരിയില്‍ അനീഷിനെ മര്‍ദിക്കുകയായിരുന്നു എന്ന് പൊലീസ് പറഞ്ഞു.പ്രതികളെ വൈക്കം കോടതിയില്‍ ഹാജരാക്കി.