കൂത്താട്ടുകുളം: നഗരസഭയില്‍ അഴിമതിയും കെടുകാര്യസ്ഥതയും ആരോപിച്ച് പ്രതിപക്ഷ പ്രതിഷേധം. നഗരത്തിലെ അനധികൃത കെട്ടിട നിര്‍മാണം, ലൈസന്‍സ് നല്‍കുന്നതിലെ അഴിമതി, ഉദ്യോഗസ്ഥ അപ്രമാദിത്തം, മഴക്കാല പൂര്‍വ രോഗ പ്രതിരോധ ശുചീകരണ പ്രവര്‍ത്തനങ്ങളിലെ വീഴ്ച തുടങ്ങിയ വിവിധ വിഷയങ്ങള്‍ ഉയര്‍ത്തി പ്രതിപക്ഷ അംഗങ്ങള്‍ കൗണ്‍സില്‍ യോഗത്തില്‍ പ്രതിഷേധിച്ചു. ബാനറും മറ്റുമായി അംഗങ്ങള്‍ സഭയുടെ നടുത്തളത്തില്‍ മുദ്രാവാക്യം മുഴക്കി. കഴിഞ്ഞ 16ന് നടന്ന കൗണ്‍സില്‍ യോഗത്തിലും പ്രതിപക്ഷം ഈ വിഷയങ്ങള്‍ ഉയര്‍ത്തി പ്രതിഷേധിച്ചിരുന്നു. എന്നാല്‍ ഇതുവരെയും യാതൊരു നടപടിയുമെടുത്തില്ല.
എല്‍.ഡി.എഫ് സഭാ നേതാവ് സി.എന്‍ പ്രഭകുമാര്‍ വിഷയങ്ങള്‍ ചൂണ്ടിക്കാട്ടി സെക്രട്ടറിക്ക് പരാതി നല്‍കിയിട്ടും നടപടി ഉണ്ടായില്ല. ഇതേത്തുടര്‍ന്നാണ് എല്‍.ഡി.എഫ് ഇന്നലെയും പ്രതിഷേധമുയര്‍ത്തിയത്. കെട്ടിട നമ്പര്‍ ഇല്ലാത്ത സ്ഥാപനങ്ങള്‍ക്ക് ലൈസന്‍സ് നല്‍കുക, കെട്ടിട നിര്‍മ്മാണ ചട്ടം ലംഘിച്ച് കെട്ടിടം നിര്‍മിക്കുന്നതിന് കൂട്ടുനില്‍ക്കുക, ആസ്ഥി രജിസ്റ്ററില്‍ ഉള്‍പ്പെട്ടിരുന്ന വസ്തുക്കള്‍ കൈയേറാന്‍ കൂട്ടുനിക്കുക, ഇതിനായി രേഖകള്‍ മുക്കുക, തുടങ്ങിയ ആരോപണങ്ങള്‍ എല്‍.ഡി.എഫ് കൗണ്‍സിലര്‍മാര്‍ യു.ഡി.എഫ് ഭരണസമിതിക്കും ഉദ്യോഗസ്ഥര്‍ക്കുമെതിരേ ഉന്നയിച്ചു.
വനിതാ വിശ്രമ കേന്ദ്രത്തില്‍ വൈദ്യുതി ലഭിക്കുന്നതിന് ഒരു നടപടിയും സ്വീകരിക്കാതിരുന്നതിനാല്‍ ഇവിടം ഇതരസംസ്ഥാന ജീവനക്കാരുടെ താവളമായി മാറി. മത്സ്യ-പച്ചക്കറി മാര്‍ക്കറ്റിലേക്കുള്ള വഴി ചെളിക്കുണ്ടായിരിക്കുകയാണ്. മഴക്കാലപൂര്‍വ ശുചീകരണ പ്രവര്‍ത്തനത്തില്‍ നഗരസഭ പൂര്‍ണ്ണ പരാജയമായമാണെന്നും പ്രതിപക്ഷം ആരോപിച്ചു. പ്രതിപക്ഷ സമരം ശക്തമായതോടെ ചെയര്‍മാന്‍ ബിജു ജോണ്‍ സഭാനടപടികള്‍ അവസാനിപ്പിച്ച് യോഗം പിരിച്ചുവിട്ടു. പ്രതിപക്ഷ പ്രതിഷേധത്തില്‍നിന്നും യു.ഡി.എഫ് ഒളിച്ചോടുന്ന നടപടിയാണിതെന്ന് എല്‍.ഡി.എഫ് കുറ്റപ്പെടുത്തി. വിവരമറിഞ്ഞെത്തിയ എല്‍.ഡി.എഫ് പ്രവര്‍ത്തകര്‍ നഗരസഭയുടെ മുന്നിലും പ്രതിഷേധിച്ചു. കൗണ്‍സിലര്‍മാരായ സണ്ണി കുര്യാക്കോസ്, ഫെബിഷ് ജോര്‍ജ്, എല്‍. വസുമതി അമ്മ, വിജയ ശിവന്‍, ഷീബ രാജു, എ.എസ് രാജന്‍, എം.എം അശോകന്‍, ലിനു മാത്യു, നളിനി ബാലകൃഷ്ണന്‍ എന്നിവര്‍ സംസാരിച്ചു. കൂത്താട്ടുകുളം നഗരസഭയിലെ യു.ഡി.എഫ് ഭരണ നേതൃത്വത്തിന്റെ അഴിമതിക്കെതിരെ ബഹുജന പ്രഷോഭം ആരംഭിക്കുമെന്ന് സി.പി.എം ലോക്കല്‍ സെക്രട്ടറി എം.ആര്‍ സുരേന്ദ്രനാഥ് പറഞ്ഞു.