കണ്ണൂര്‍: ഡല്‍ഹിയില്‍ നടക്കുന്ന കോമണ്‍വെല്‍ത്ത് ചെസ് ചാം പ്യന്‍ഷിപ്പില്‍ ഇന്ത്യയെ പ്രതിനിധീകരിച്ച് കണ്ണൂരില്‍നിന്ന് സഹോദരങ്ങളും. കണ്ണൂര്‍ സ്വദേശികളായ ഹരീന്ദ്രന്റെയും നിവ്യയുടെയും മക്കളായ അവിനാശ് ഹരിയും റോഷന്‍ ഹരിയുമാണ് 25 മുതല്‍ ജൂലൈ 4 വരെ നടക്കുന്ന ചാംപ്യന്‍ഷിപ്പില്‍ പങ്കെടുക്കുന്നത്. നിരവധി തവണ ഇവര്‍ ദേശീയ ചെസ് മത്സരങ്ങളില്‍ കേരളത്തെ പ്രതിനിധീകരിക്കുകയും സമ്മാനങ്ങള്‍ നേടുകയും ചെയ്തിട്ടുണ്ട്.
അവിനാശ് എ.കെ.ജി എസ്.ജി എച്ച്.എസ്.എസ് പെരളശ്ശേരിയിലെ പ്ലസ് വണ്‍ വിദ്യാര്‍ഥിയും റോഷന്‍ ചൊവ്വ എച്ച്.എസ്.എസിലെ 9ാം ക്ലാസ് വിദ്യാര്‍ഥിയുമാണ്. കണ്ണൂരിലെ സി.വി.കെ ബാലകൃഷ്ണന്‍, തൃശ്ശൂരിലെ ഒളിംപ്യന്‍ എന്‍.ആര്‍ അനില്‍കുമാര്‍, ഇന്റര്‍നാഷണല്‍ മാസ്റ്റര്‍ രത്‌നാകരന്‍, കോയമ്പത്തൂരിലെ ധനശേഖരന്‍ തുടങ്ങിയവരുടെ കീഴിലാണ് പരിശീലനം.