തിരുവനന്തപുരം: വ്യക്തിഹത്യ നടത്തുന്നതായും മാനഹാനിയുണ്ടാക്കുന്നതായും കാണിച്ച് മന്ത്രി എ.സി.മൊയ്തീന്റെ സ്‌പെഷ്യല്‍ പ്രൈവറ്റ് സെക്രട്ടറിക്കെതിരേ മുഖ്യമന്ത്രിക്ക് പ്രവാസിയുടെ പരാതി. ഒ.ഐ.സി.സി. ഗ്ലോബല്‍ കമ്മിറ്റി വൈസ് പ്രസിഡന്റ് കെ.കെ.ഉസ്മാനാണ് മന്ത്രി എ.സി മൊയ്തീന്റെ സ്‌പെഷ്യല്‍ പ്രൈവറ്റ് സെക്രട്ടറിയായ രാജാറാം തമ്പിക്കെതിരേ മുഖ്യമന്ത്രിക്ക് പരാതി നല്‍കിയത്.

രാജാറാം തമ്പി തനിക്കും പ്രതിപക്ഷ നേതാവ് രമേശ് ചെന്നിത്തലയ്ക്കുമെതിരേ സോഷ്യല്‍ മീഡിയയിലൂടെ വ്യക്തിഹത്യ നടത്തുകയാണ്. പൂര്‍ണ ഗര്‍ഭിണിയായ മകളോടൊപ്പം കഴിഞ്ഞ ദിവസം നാട്ടിലെത്തിയ തന്നെ വ്യക്തിപരമായി അധിക്ഷേപിക്കുന്ന തരത്തിലാണ് ഇദ്ദേഹത്തിന്റെ ഫേസ്ബുക്ക് പോസ്റ്റുകള്‍. പ്രതിപക്ഷ നേതാവിനെ അധിക്ഷേപിക്കുന്ന പോസ്റ്റുകളുമുണ്ട്. സര്‍ക്കാര്‍ ഖജനാവില്‍ നിന്നു ശമ്പളം പറ്റുന്ന ഒരു ഉദ്യോഗസ്ഥന്‍ ഉത്തരവാദപ്പെട്ട സ്ഥാനത്തിരിക്കുന്ന പ്രതിപക്ഷ നേതാവിനെ ആക്ഷേപിക്കുന്നത് എല്ലാ ചട്ടങ്ങളുടേയും ലംഘനമാണ്. ബഹുമാന്യ വ്യക്തികളെ പരിഹസിക്കുകയും അധിക്ഷേപിക്കുകയും ചെയ്യുന്ന വിധത്തില്‍ ട്രോളുകള്‍ തയാറാക്കുന്ന സംഘം ഇദ്ദേഹത്തിന്റെ നേതൃത്വത്തില്‍ പ്രവര്‍ത്തിക്കുന്നതായി സംശയിക്കുന്നു. മാന്യമായി ജീവിക്കുന്ന തന്നെ വ്യക്തിഹത്യ ചെയ്യുന്നതിന് ഇദ്ദേഹം ഒരു മന്ത്രിയുടെ ഓഫിസിനെ തന്നെ ദുരുപയോഗം ചെയ്യുകയാണെന്ന് ഉസ്മാന്‍ പരാതിയില്‍ പറയുന്നു.
ഏക മകളുടെ പ്രസവത്തിനായി അവള്‍ക്കൊപ്പം നാട്ടിലെത്തിയ തനിക്കെതിരെ നടത്തുന്ന വ്യാജ പ്രചാരണം തന്നേയും കുടുംബത്തേയും ഏറെ വേദനിപ്പിച്ചതായി ഉസ്മാന്‍ വ്യക്തമാക്കുന്നു. പരാതിയുടെ കോപ്പി മന്ത്രി എ.സി.മൊയ്തീനും പ്രതിപക്ഷ നേതാവിനും കൈമാറിയിട്ടുണ്ട്.