പാലക്കാട്: ഷാഫി പറമ്പില്‍ എം.എല്‍.എക്കെതിരെ സമൂഹ മാധ്യമത്തില്‍ അധിക്ഷേപിച്ച് വ്യാജ പ്രചാരണം നടത്തിയെന്ന പരാതിയില്‍ പുന്നയൂര്‍ക്കുളം പഞ്ചായത്ത് മുന്‍ പ്രസിഡന്റ് അറസ്റ്റില്‍. മുന്‍ പ്രസിഡന്റും സി.പി.എം നേതാവുമായ സി.ടി. സോമരാജിനെയാണ് (56) വടക്കേക്കാട് പൊലിസ് അറസ്റ്റ് ചെയ്തത്.

'ഷാഫി പറമ്പിലിന് കോവിഡ് ബാധ: സൂക്ഷിക്കുന്നത് നന്നായിരിക്കും' എന്ന രീതിയില്‍ സി.ടി. സോമരാജന്‍ ഫേസ് ബുക്കിലാണ് പ്രചാരണം നടത്തിയത്. ഇക്കാര്യം ആരോപിച്ച യൂത്ത് കോണ്‍ഗ്രസ് ഗുരുവായൂര്‍ നിയോജക മണ്ഡലം പ്രസിഡന്റ് നിഖില്‍ ജി കൃഷ്ണയാണ് പരാതി നല്‍കിയത്. ഇതേ പരാതി ഉന്നയിച്ച് തൃശൂര്‍ ജില്ലാ പ്രസിഡന്റ് ഒ.ജെ. ജനീഷ് സിറ്റി പൊലിസ് ഓഫിസിലും പരാതി നല്‍കിയിരുന്നു.

പരാതിക്ക് കാരണമായ പോസ്റ്റ് സോമരാജ് ഉടനെ പിന്‍വലിച്ചെങ്കിലും പോസ്റ്റിന്റെ സ്‌ക്രീന്‍ ഷോട്ട് സഹിതമാണ് ജനിഷും നിഖിലും പരാതി നല്‍കിയത്.അപകീര്‍ത്തിപ്പെടുത്തലിനും വ്യാജ വാര്‍ത്ത പ്രചരിപ്പിച്ചതിനുമാണ് സോമരാജനെതിരെ കേസെടുത്തത്.