മുസഫര്‍നഗര്‍: രാജ്യത്ത് രണ്ടിടങ്ങളിലായുള്ള വാഹനാപകടങ്ങളില്‍ 14 അതിഥി തൊഴിലാളികള്‍ മരിച്ചു. യു.പിയില്‍ അതിവേഗതയില്‍ വന്നസ്റ്റേറ്റ് ട്രാന്‍സ്‌പോര്‍ട്ട് ബസ് അതിഥി തൊഴിലാളികള്‍ക്കു മേല്‍ പാഞ്ഞുകയറിയാണ് അപകടമുണ്ടായത്. ആറു പേര്‍ കൊല്ലപ്പട്ടു. രണ്ടു പേര്‍ക്ക് പരുക്കേറ്റു. പഞ്ചാബില്‍ നിന്ന് ബിഹാറിലേക്കുള്ള നടത്തത്തിലായിരുന്നു ഇവര്‍.

മധ്യപ്രദേശിലെ ഗുണയില്‍ അതിഥി തൊഴിലാളികളെ കൊണ്ടുപോയ ട്രക്കില്‍ ബസിടിച്ചാണ് അപകടമുണ്ടായത്. എട്ടുപേരാണ് കൊല്ലപ്പെട്ടത്.

ലോക്ക്ഡൗണില്‍ വിവിധ സംസ്ഥാനങ്ങളില്‍ കുടുങ്ങിപ്പോയ അതിഥി തൊഴിലാളികള്‍ സ്വന്തം നാട്ടിലേക്കെത്താനുള്ള നെട്ടോട്ടത്തിനിടയില്‍ ജീവന്‍ നഷ്ടപ്പെടുന്ന സംഭവങ്ങള്‍ കൂടിവരികയാണ്. മേയ് 8നാണ് മഹാരാഷ്ട്രയിലെ ഔറംഗാബാദില്‍ റെയില്‍വേ ട്രാക്കില്‍ കിടന്നുറങ്ങുകയായിരുന്ന 14 അതിഥി തൊഴിലാളികള്‍ തീവണ്ടിയിടിച്ച് മരിച്ചത്. മധ്യപ്രദേശിലേക്ക് റെയില്‍ ട്രാക്ക് വഴി നടന്നു പോവുകയായിരുന്ന കുടിയേറ്റ തൊഴിലാളികളുടെ സംഘമാണ് അപകടത്തില്‍പ്പെട്ടത്. സ്ത്രീകളും കുട്ടികളുമുള്‍പ്പെട്ട സംഘം ട്രാക്കില്‍ കിടന്നുറങ്ങുകയായിരുന്നു.