കാളികാവ്: കൂരാട് ചുണ്ടക്കുന്നിലെ പഴേടത്ത് മുണ്ടന്റെ കൃഷിയിടത്തിലെ വാഴകള്‍ നശിപ്പിച്ചതായി പരാതി. വെള്ളിയാഴ്ച രാത്രിയാണു വാഴകള്‍ സാമൂഹ്യവിരുദ്ധര്‍ ചവിട്ടി നശിപ്പിച്ചത്. ചെമ്മലപ്പുറവന്‍ അലവിയുടെ ഭൂമി പാട്ടത്തിനെടുത്താണു മുണ്ടന്‍ കൃഷി നടത്തുന്നത്. മുമ്പും വാഴകള്‍ നശിപ്പിച്ചിരുന്നു. ബാങ്ക് വായ്പ എടുത്തു നടത്തുന്ന കൃഷിനശിപ്പിച്ചതു കര്‍ഷകനു വന്‍ തിരിച്ചടിയായിട്ടുണ്ട്. 30 വാഴകളാണ് വെള്ളിയാഴ്ച നശിപ്പിച്ചത്. മുമ്പ് 28 വാഴകളും നശിപ്പിച്ചിരുന്നു. പൊലിസില്‍ പരാതി നല്‍കിയെങ്കിലും നശിപ്പിച്ചയാളെ ഉപദേശിച്ചു വിട്ടതല്ലാതെ ഒരു നടപടിയും ഉണ്ടായിട്ടില്ല. പരാതി നല്‍കിയതിനെത്തുടര്‍ന്നു പൊലിസ് സ്ഥലത്തെത്തി പരിശോധന നടത്തി.
വീണ്ടും കൃഷി നശിപ്പിച്ചതോടെ പുനര്‍ കൃഷി നടത്താന്‍ കഴിയാത്ത നിലയിലായിട്ടുണ്ട്. ബാങ്ക് വായ്പ എടുത്ത 25000 രൂപ തിരിച്ചടയ്ക്കാന്‍ സാധിക്കാത്തതില്‍ പ്രയാസമുണ്ടെന്ന് മുണ്ടന്‍ പറഞ്ഞു. നേന്ത്ര വാഴക്ക് വിലയുള്ളതിനാല്‍ തൈകള്‍ നല്ല വിലയാണെന്നും പുറമെ കൃഷി ചെയ്ത് രണ്ട് മാസം കഴിഞ്ഞതിന് ശേഷം വിളകള്‍ നശിപ്പിച്ചതിനാല്‍ വെച്ചു പിടിപ്പിക്കുക പ്രയാസമാണെന്നും മുണ്ടന്‍ പറഞ്ഞു.