തിരുവനന്തപുരം: ലോക്ക് ഡൗണിനിടെ സര്‍വിസ് നടത്തുന്ന പ്രത്യേക ട്രെയിനുകളിലെ യാത്രക്ക് മാര്‍ഗനിര്‍ദേശങ്ങള്‍ പുറത്തിറക്കി റെയില്‍വേ.
സ്റ്റേഷന്‍ പരിസരത്തും പാര്‍ക്കിങ് ഏരിയയിലും വാഹനങ്ങള്‍ പാര്‍ക്ക് ചെയ്യാന്‍ അനുവദിക്കില്ല. സ്ഥിരീകരിച്ച ടിക്കറ്റുള്ള യാത്രക്കാരെ മാത്രമേ റെയില്‍വേ സ്റ്റേഷനില്‍ പ്രവേശിക്കാന്‍ അനുവദിക്കുകയുള്ളൂ. ട്രെയിന്‍ പുറപ്പെടുന്നതിന് ഒന്നര മണിക്കൂര്‍ മുന്‍പ് യാത്രക്കാര്‍ സ്റ്റേഷനിലെത്തണമെന്നും മാര്‍ഗനിര്‍ദേശത്തില്‍ പറയുന്നു. യാത്രക്കാര്‍ ഹാന്‍ഡ് സാനിറ്റൈസറുകളും മാസ്‌ക്കുകളും കരുതണം. യാത്രയിലുടനീളം മാസ്‌ക് ധരിക്കണം. സാമൂഹികഅകലം പാലിക്കണം. കോച്ചുകളില്‍ അനാവശ്യമായി സഞ്ചരിക്കരുത്. വാതിലുകള്‍ക്ക് സമീപം നില്‍ക്കരുത്. അധികൃതര്‍ നിര്‍ദേശിക്കുന്ന എല്ലാ സുരക്ഷാ പ്രോട്ടോക്കോളുകളും പാലിക്കണം. യാത്രക്കാര്‍ അവരുടെ മൊബൈല്‍ ഫോണുകളില്‍ ആരോഗ്യസേതു ആപ്പ് ഇന്‍സ്റ്റാള്‍ ചെയ്യണമെന്നും നിര്‍ദേശത്തിലുണ്ട്.