തിരൂര്‍: തിരൂര്‍ ജില്ലാ ആശുപത്രിയില്‍ പരിശോധനയ്ക്ക് ആവശ്യത്തിന് ഡോക്ടര്‍മാര്‍ എത്താതിരുന്നതിനാല്‍ രോഗികള്‍ വലഞ്ഞത് മണിക്കൂറുകള്‍. അപകടത്തില്‍ മരിച്ചയാളുടെ പോസ്റ്റ് മോര്‍ട്ടവും വൈകി. തുടര്‍ന്ന് രോഗികളും മരിച്ചയാളുടെ ബന്ധുക്കളും സുഹൃത്തുക്കളും ആശുപത്രിയില്‍ ബഹളം വച്ച് പ്രതിഷേധിച്ചു.
അവധിയിലായിരുന്ന ആശുപത്രി സൂപ്രണ്ടിനെ ഫോണില്‍ ബന്ധപ്പെടാന്‍ ജനങ്ങള്‍ ശ്രമിച്ചെങ്കിലും ജീവനക്കാര്‍ ഫോണ്‍ നമ്പര്‍ നല്‍കിയില്ല.
തുടര്‍ന്ന് തിരൂര്‍ നഗരസഭാ ചെയര്‍മാനെയും മന്ത്രി കെ.ടി ജലീലിനെയും ഇവര്‍ വിവരം അറിയിച്ചു. തുടര്‍ന്ന് മന്ത്രി തന്നെ നേരിട്ട് ആശുപത്രിയിലേക്ക് വിളിച്ച് പോസ്റ്റ് മോര്‍ട്ടം നടത്താന്‍ നിര്‍ദേശിക്കുകയായിരുന്നു. എന്നാല്‍ ഇന്നലെ രാവിലെ വളരെ നേരത്തെ തന്നെ ഒ.പിയിലെത്തി ടോക്കണ്‍ എടുത്ത് കാത്തുനിന്നവരുടെ കാര്യം വളരെ കഷ്ടമായിരുന്നു. ഇവരില്‍ മിക്കവരും ഏറെ ബുദ്ധിമുട്ടിയാണ് ഇന്നലെ ചികിത്സ തേടിയത്. പ്രായമായവര്‍ നിലത്ത് കിടന്നും ഇരുന്നും കാത്തിരുന്നാണ് ഡോക്ടര്‍മാരെ കണ്ടത്. എന്നാല്‍ പരിശോധന പേരിന് മാത്രമായിരുന്നുവെന്ന് ചികിത്സക്കെത്തിയവര്‍ പറഞ്ഞു.
ആശുപത്രി സൂപ്രണ്ട് ഉള്‍പ്പെടെയുള്ള ഡോക്ടര്‍മാര്‍ അവധിയിലായതിനാല്‍ ഇന്നലെ രണ്ട് ഡോക്ടര്‍മാര്‍ മാത്രമേ രോഗികളെ പരിശോധിക്കാനുണ്ടായിരുന്നുള്ളൂ. എന്നാല്‍ നൂറുകണക്കിന് രോഗികളുണ്ടായിരുന്നു. അതു കാരണം പലര്‍ക്കും ചികിത്സ ലഭിച്ചതുമില്ല. ഉച്ചയായിട്ടും ഇന്നലെ ചികിത്സയ്ക്കായി എത്തിയവരുടെ തിരക്കായിരുന്നു ആശുപത്രിയില്‍. ആശുപത്രിയിലെത്തിയവര്‍ ദുരവസ്ഥയെക്കുറിച്ച് പരാതി പറയാന്‍ ചെന്നപ്പോഴാണ് സൂപ്രണ്ട് അടക്കമുള്ളവര്‍ അവധിയിലാണെന്ന് അറിയുന്നത്.
പോസ്റ്റ് മോര്‍ട്ടം വൈകുന്നതില്‍ പ്രതിഷേധിച്ച് എത്തിയവരും രോഗികളും ചേര്‍ന്ന് പിന്നീട് പ്രതിഷേധവുമായി രംഗത്തുവരികയായിരുന്നു. ഡിഫ്തീരിയ അടക്കമുള്ള രോഗങ്ങള്‍ ജില്ലയില്‍ റിപ്പോര്‍ട്ട് ചെയ്ത സാഹചര്യത്തിലും മതിയായ ചികിത്സയും മരുന്നും ലഭ്യമാക്കാന്‍ സര്‍ക്കാര്‍ ആശുപത്രികളില്‍ സംവിധാനമൊരുക്കാത്തതില്‍ പ്രതിഷേധം ശക്തമായിട്ടുണ്ട്.