കോട്ടക്കല്‍: ആയുര്‍വേദ സര്‍വകലാശാലക്ക് ഇത്തവണയും ബജറ്റില്‍ തുക മാറ്റിവെക്കാത്തതിനാല്‍ സര്‍വകലാശാലക്കായുള്ള കാത്തിരിപ്പ് ഇനിയും നീളും. ശതാബ്ദി പൂ ര്‍ത്തീകരിച്ച ആര്യവൈദ്യശാലയെ സര്‍വകലാശാലയാക്കി ഉയര്‍ത്തണമെന്നുള്ളതു കാലങ്ങളായുള്ള ആവശ്യമാണ്. ഏറെക്കാലമായി പൊതുജനങ്ങളില്‍നിന്നും ആയുര്‍വേദ രംഗത്തെ വിദഗ്ധരില്‍നിന്നും ഉയര്‍ന്നുവരുന്ന ആവശ്യമാണു കോട്ടക്കലില്‍ അന്താരാഷ്ട്ര നിലവാരത്തിലുള്ള ഒരു സര്‍വകലാശാല എന്നത്.
മനോരോഗം, വിഷം, പഞ്ചകര്‍മം എന്നിങ്ങനെ നിരവധി മേഖലകളില്‍ ചികിത്സയും ബിരുദാനന്തര ബിരുദ പഠനവും നിലവിലുണ്ട്. കഴിഞ്ഞ സര്‍ക്കാരിന്റെ കാലത്തു സര്‍വകലാശാലക്കുള്ള നടപടികള്‍ ആരംഭിച്ചെങ്കിലും ജില്ലാ കലക്ടറെ പ്രൊജക്ട് ഓഫിസറായി ചുമലതപ്പെടുത്തിയതിനപ്പുറത്തേക്കു കാര്യങ്ങള്‍ നീങ്ങിയിരുന്നില്ല. ആര്യവൈദ്യശാല ആയുര്‍വേദ കോളജിനെ ആയുര്‍വേദ ശാസ്ത്രസാങ്കേതിക സര്‍വകലാശാലയാക്കണമെന്നു കോട്ടക്കല്‍ എംഎല്‍എ പ്രൊഫ.ആബിദ് ഹുസൈന്‍ തങ്ങള്‍ നിയമസഭയില്‍ സബ്മിഷനിലൂടെ ആവശ്യപ്പെട്ടിരുന്നു.
പുതിയ സര്‍വകലാശാലയുടെ സാധ്യതകള്‍ വിശദമായി വിലയിരുത്തുവാന്‍ വിദഗ്ധസമിതി രൂപീകരിക്കുമെന്നു ആരോഗ്യമന്ത്രി കെ.കെ ശൈലജ സബ്മിഷനു മറുപടിയായി രേഖമൂലം അറിയിച്ചിരുന്നുവെങ്കിലും ബജറ്റില്‍ തുക വകയിരുത്താത്തതിനാല്‍ സര്‍വകലാശാലക്കുള്ള കാത്തിരിപ്പിനിയും നീളും.