ന്യൂഡല്‍ഹി: നോട്ടുനിരോധനത്തിനു ശേഷം പഴയ കറന്‍സി നോട്ടുകളുടെ നിക്ഷേപം ഏറ്റവും കൂടുതല്‍ നടന്നത് അമിത്ഷായുടെ ബാങ്കിലെന്ന റിപ്പോര്‍ട്ട് ബി.ജെ.പിയെ പ്രതിരോധത്തിലാക്കുന്നു. 

ഗുജറാത്തിലെ അഹമ്മദാബാദ് ജില്ലാ സഹകരണ ബാങ്കിലാണ് നിക്ഷേപം ഏറ്റവും കുടുതലുണ്ടായതെന്ന് വിവരാവകാശ വന്ന രേഖയിലായിരുന്നു പുറത്തുവന്നത്. ബാങ്ക് ഡയറക്ടറും ബി.ജെ.പി ദേശീയ അധ്യക്ഷനുമായ അമിത് ഷായ്‌ക്കെതിരേ പ്രതിയോഗികള്‍ ഇത് രാഷ്ട്രീയ ആയുധമാക്കുകയാണ്. നോട്ട് നിരോധനം പ്രഖ്യാപിച്ച ശേഷമുള്ള അഞ്ചു ദിവസം 745.59 കോടി രൂപ ബാങ്കില്‍ നിക്ഷേപിക്കപ്പെട്ടതായാണ് രേഖകളില്‍ പറയുന്നത്.
18 വര്‍ഷമായി അമിത് ഷാ അഹമ്മദാബാദ് ജില്ലാ സഹകരണ ബാങ്കിന്റെ ഡയറക്ടറാണ്. സംസ്ഥാന കാബിനറ്റ് മന്ത്രിയും ബി.ജെ.പി നേതാവുമായ ജയേഷ് ഭായ് വിത്തല്‍ഭായ് രദാദിയ ചെയര്‍മാനായ ഗുജറാത്തിലെ തന്നെ രാജ്‌കോട്ട് ജില്ലാ സഹകരണ ബാങ്കാണ് നിക്ഷേപത്തില്‍ രണ്ടാം സ്ഥാനത്തുള്ളത് (693.19കോടി).
കള്ളപ്പണം തടയാന്‍ നവംബര്‍ 14ന് ശേഷം ജില്ലാ സഹകരണ ബാങ്കുകളിലെ നിക്ഷേപം അനുവദിച്ചിട്ടില്ല. എന്നാല്‍ അഞ്ചു ദിവസത്തിനുള്ളില്‍ ബി.ജെ.പി നേതാക്കളുമായി ബന്ധമുള്ള ബാങ്കുകളില്‍ കൂടുതല്‍ നിക്ഷേപം നടന്നത് കോണ്‍ഗ്രസ് അടക്കമുള്ള പ്രതിപക്ഷ കക്ഷികള്‍ ചോദ്യം ചെയ്യുകയാണ്.
വിഷയത്തില്‍ എന്ത് പ്രതികരിക്കുമെന്ന പ്രയാസത്തിലാണ് ബി.ജെ.പി. മുംബൈയിലെ വിവരാവകാശ പ്രവര്‍ത്തകന്‍ മനോരഞ്ജന്‍ എസ്. റായിയുടെ അപേക്ഷയിലാണ് വിവരങ്ങള്‍ പുറത്തു വന്നത്.