റോസ്‌റ്റോവ് അരീന: ഗ്രൂപ്പ് എഫിലെ നിര്‍ണായക മത്സരത്തില്‍ ദക്ഷിണ കൊറിയയെ ഒന്നിനെതിരേ രണ്ട് ഗോളുകള്‍ക്ക് തകര്‍ത്ത് മെക്‌സിക്കോ പ്രീക്വാര്‍ട്ടര്‍ പ്രവേശനം എളുപ്പമാക്കി. ജയത്തോടെ ആറ് പോയിന്റുമായി മെക്‌സിക്കോയാണ് ഗ്രൂപ്പില്‍ മുന്‍പിലുള്ളത്. ആദ്യ മത്സരത്തില്‍ മുന്‍ ലോക ചാംപ്യന്മാരെ അട്ടിമറിച്ച മെക്‌സിക്കോ മത്സരത്തിന്റെ തുടക്കം മുതല്‍ ദക്ഷിണ കൊറിയക്ക് മേല്‍ പൂര്‍ണ ആധിപത്യം പുലര്‍ത്തി. തുല്യ ശക്തികളുടെ പോരാട്ടമായിരുന്നെങ്കിലും പന്തടക്കത്തില്‍ മുന്നിട്ടു നിന്നത് മെക്‌സിക്കോ ആയിരുന്നു. ഗ്രൂപ്പിലെ രണ്ട് മത്സരങ്ങളും പരാജയപ്പെട്ടതോടെ ദക്ഷിണ കൊറിയയുടെ പ്രതീക്ഷകള്‍ അസ്തമിച്ചു. 

26ാം മിനുട്ടില്‍ ലഭിച്ച പെനാല്‍റ്റിയാണ് മത്സരത്തിന്റെ ഗതി മാറ്റിമറിച്ചത്. ബോക്‌സില്‍ വച്ച് ലൊസാനോ ഹെര്‍ണാണ്ടസിനെ ലക്ഷ്യമാക്കി നല്‍കിയ പന്ത് കൊറിയന്‍ താരം ജാങ് ഹ്യുന്‍ സോയുടെ കൈയില്‍ തട്ടി. റഫറി പെനാല്‍റ്റി അനുവദിച്ചു. കിക്കെടുത്ത കാര്‍ലോസ് വേല പന്ത് പോസ്റ്റിന്റെ വലതു മൂലയിലെത്തിച്ചു. ഗോള്‍ വീണതോടെ ഉണര്‍ന്ന് കളിച്ച ദക്ഷിണ കൊറിയ മികച്ച മുന്നേറ്റങ്ങള്‍ നടത്തിയെങ്കിലും മെക്‌സിക്കന്‍ ഗോള്‍കീപ്പര്‍ ഒച്ചോവക്ക് മുന്നില്‍ പരാജയപ്പെട്ടു. 66ാം മിനുട്ടില്‍ ഹെര്‍ണാണ്ടസ് മെക്‌സിക്കോയുടെ രണ്ടാം ഗോളും നേടി. കൊറിയന്‍ താരം സണ്‍ നടത്തിയ പല നീക്കങ്ങളും ഒച്ചോവയാണ് രക്ഷപ്പെടുത്തിയത്. കളി അവസാനിക്കാനിരിക്കെ ബോക്‌സിന് പുറത്ത് നിന്നുള്ള ബുള്ളറ്റ് ഷോട്ടിലൂടെ സണ്‍ തന്നെ കൊറിയയുടെ ആശ്വാസ ഗോള്‍ നേടി.