എടവണ്ണപ്പാറ: ജീവകാരുണ്യ രംഗത്ത് സജീവമായിരിക്കെ വിടപറഞ്ഞ കെ.എം.സി.സി സഊദി നാഷനല്‍ കമ്മിറ്റി സെക്രട്ടറിയായിരുന്ന കെ.വി.എ ഗഫൂര്‍ വെട്ടുപാറയുടെ സ്മരണക്കായി വെട്ടുപാറ സി.എച്ച് സെന്റര്‍ ഏര്‍പ്പെടുത്തിയ പുരസ്‌കാരം ഫിറോസ് കുന്നംപറമ്പിലിന്. സോഷ്യല്‍ മീഡിയയിലൂടെ കാരുണ്യ പ്രവര്‍ത്തനങ്ങള്‍ക്ക് വേണ്ടി നടത്തുന്ന ഇടപെടലുകള്‍ കണക്കിലെടുത്താണ് അവാര്‍ഡ്. പാലക്കാട് സ്വദേശിയാണ് ഫിറോസ്.
ഇ.ടി മുഹമ്മദ് ബഷീര്‍ എം.പി ചെയര്‍മാനായ ജൂറിയാണ് അവാര്‍ഡ് ജേതാവിനെ തെരഞ്ഞെടുത്തത്. ടി.വി ഇബ്രാഹിം എം.എല്‍.എ, കെ.എം.സി.സി സഊദി നാഷനല്‍ കമ്മിറ്റി പ്രസിഡന്റ് കെ.പി മുഹമ്മദ് കുട്ടി എന്നിവരാണ് മറ്റു ജൂറി അംഗങ്ങള്‍.
25,000 രൂപയും പ്രശസ്തി പത്രവുമടങ്ങുന്ന പുരസ്‌കാരം സി.എച്ച് സെന്റര്‍ അടുത്ത മാസം രണ്ടാം വാരത്തില്‍ സംഘടിപ്പിക്കുന്ന വാര്‍ഷിക പരിപാടിയില്‍ സമ്മാനിക്കും.