ജിദ്ദ: വാറ്റ് അഞ്ചു ശതമാനത്തില്‍ നിന്ന് 2020 വരെ അധികമായി ഉയര്‍ത്തില്ലെന്ന് ധനമന്ത്രി മുഹമ്മദ് അല്‍ജദ്ആന്‍. സര്‍ക്കാര്‍ പദ്ധതികള്‍ നടപ്പാക്കുന്ന കരാറുകാര്‍ക്കുള്ള വിഹിതം കാലതാമസം കൂടാതെ വിതരണം ചെയ്യും. കരാര്‍ പ്രകാരം വിഹിതം വിതരണം ചെയ്യേണ്ട ദിവസം മുതല്‍ രണ്ടു മാസത്തിനകം പണം വിതരണം ചെയ്യുമെന്നും അദ്ദേഹം പറഞ്ഞു.
അതേ സമയം സഊദി കമ്പനികളുടെ ലാഭത്തിന് നികുതി ചുമത്തില്ലെന്ന് ധനമന്ത്രി വ്യക്തമാക്കി. അശ്ശര്‍ഖിയ ചേംബര്‍ ഓഫ് കൊമേഴ്‌സ് സംഘടിപ്പിച്ച പരിപാടിയില്‍ പങ്കെടുത്താണ് മന്ത്രി ഇക്കാര്യം അറിയിച്ചത്. സഊദി പൗരന്മാര്‍ക്കും ആദായ നികുതി ബാധകമാക്കില്ല.

വിഷന്‍ 2030 പദ്ധതി ലക്ഷ്യങ്ങള്‍ നേടുന്നതിന് പെട്രോളിതര മേഖല എട്ടര ശതമാനം വാര്‍ഷിക വളര്‍ച്ച നേടുകയും പെട്രോളിതര മേഖലയിലെ മൊത്തം ആഭ്യന്തരോല്‍പാദനം 1.6 ട്രില്യണ്‍ റിയാലായി വര്‍ധിക്കുകയും വേണം. സ്വകാര്യ മേഖലക്ക് പ്രോത്സാഹനം നല്‍കുന്നതിന് നാലു വര്‍ഷത്തിനുള്ളില്‍ 20,000 കോടി റിയാല്‍ വിനിയോഗിക്കും. കഴിഞ്ഞ രണ്ടു വര്‍ഷത്തിനിടെ നിരവധി സാമ്പത്തിക, ധന നയങ്ങള്‍ക്ക് സഊദി അറേബ്യ രൂപം നല്‍കിയിട്ടുണ്ട്.

ഊര്‍ജ ഉല്‍പന്നങ്ങളുടെ ഭാഗികമായ നിരക്ക് പരിഷ്‌കരണം, കസ്റ്റംസ് തീരുവ ഭേദഗതി, സര്‍ക്കാര്‍ ജീവനക്കാരുടെ അലവന്‍സുകള്‍ നിര്‍ത്തിവെക്കല്‍ പോലെ ലോകത്തെ ഏറ്റവും വലിയ സമ്പദ്‌വ്യവസ്ഥകളുടെ നയങ്ങളുമായി ഒത്തുപോകുന്ന ഏതാനും പരിഷ്‌കരണങ്ങള്‍ ഇതിനകം നടപ്പാക്കിയിട്ടുണ്ട്. കസ്റ്റംസ് നടപടികള്‍ ലഘൂകരിച്ചിട്ടുണ്ട്. ഇറക്കുമതി വ്യാപാരികള്‍ കസ്റ്റംസില്‍ സമര്‍പ്പിക്കേണ്ട രേഖകളുടെ എണ്ണം 12 ല്‍ നിന്ന് നാലായും കയറ്റുമതി വ്യാപാരികള്‍ സമര്‍പ്പിക്കേണ്ട രേഖകളുടെ എണ്ണം ഒമ്പതില്‍ നിന്ന് മൂന്നായും കുറച്ചിട്ടുണ്ടെന്നും മുഹമ്മദ് അല്‍ജദ്ആന്‍ പറഞ്ഞു.