ന്യൂഡല്‍ഹി: വരുന്ന ലോക്‌സഭാ തെരഞ്ഞെടുപ്പില്‍ പ്രധാനമന്ത്രി നരേന്ദ്രമോദി വാരണാസിയില്‍ നിന്നും തന്നെ ജനവിധി തേടും. ബി.ജെ.പി പാര്‍ലമെന്ററി യോഗത്തിലാണ് ഇതു സംബന്ധിച്ച് തീരുമാനമായത്. എന്നാല്‍ ഇക്കാര്യത്തില്‍ ഔദ്യോഗിക സ്ഥിരീകരണം വന്നിട്ടില്ല.

2014 ലോക്‌സഭാ തെരഞ്ഞെടുപ്പില്‍ വാരണാസിയില്‍ മത്സരിച്ച മോദി മൂന്ന് ലക്ഷത്തിലേറെ വോട്ടുകള്‍ക്കാണ് എ.എ.പി നേതാവ് അരവിന്ദ് കെജരിവാളിനെ പരാജയപ്പെടുത്തിയത്. വാരണാസിയില്‍ കൂടാതെ വഡോദരയിലും മോദി മത്സരിച്ചിരുന്നു. 1998 മുതല്‍ ബിജെപിയെ പിന്തുണയ്ക്കുന്ന മണ്ഡലമാണ് വഡോദര.

2014 ല്‍ വാരണാസിയിലും വഡോദരയിലും വിജയിച്ച മോദി വഡോദരയിലെ സീറ്റ് രാജിവെച്ചൊഴിഞ്ഞതിനെ തുടര്‍ന്ന് രഞ്ജന്‍ ബട്ടാണ് ബി.ജെ.പിക്ക് വേണ്ടി മത്സരിച്ച് വിജയിച്ചത്.

സ്ഥാനാര്‍ത്ഥികള്‍ക്കുള്ള പ്രായപരിധി ഒഴിവാക്കാനും യോഗത്തില്‍ തീരുമാനമായി.വിജയ സാധ്യതയുള്ള സ്ഥാനാര്‍ത്ഥികളില്‍ 75 വയസ്സിന് മുകളില്‍ പ്രായമുള്ളവരെയും പരിഗണിക്കാമെന്നാണ് ബി.ജെപി പാര്‍ലമെന്ററി പാര്‍ട്ടി യോഗത്തില്‍ തീരുമാനമായത്.