തിരുവനന്തപുരം: കേരളത്തിന്റെ പച്ചപ്പും പരിസ്ഥിതിയും സംരക്ഷിക്കാനുള്ള പദ്ധതിയുടെ ഭാഗമായി ഈ വര്‍ഷം സംസ്ഥാനത്ത് ഒരു കോടി ഒമ്പതു ലക്ഷം വൃക്ഷത്തൈകള്‍ വച്ചുപിടിപ്പിക്കുമെന്ന് മുഖ്യമന്ത്രി പിണറായി വിജയന്‍.

ലോക പരിസ്ഥിതി ദിനത്തില്‍ 81 ലക്ഷം തൈകള്‍ നടും. രണ്ടാംഘട്ടമായി ജൂലൈ ഒന്നു മുതല്‍ ഏഴു വരെയുള്ള ദിവസങ്ങളില്‍ 28 ലക്ഷം തൈകള്‍ കൂടി നടും. വനം വകുപ്പും കൃഷി വകുപ്പും ചേര്‍ന്നാണ് തൈകള്‍ തയാറാക്കുന്നത്. തൊഴിലുറപ്പു പദ്ധതിക്കു കീഴില്‍ 12 ലക്ഷം തൈകള്‍ ഒരുക്കിയിട്ടുണ്ടെന്നും മുഖ്യമന്ത്രി ഫേസ്ബുക്കില്‍ കുറിച്ചു. തയാറെടുപ്പുകള്‍ മന്ത്രിമാരായ കെ. രാജുവും വി.എസ് സുനില്‍കുമാറും ബന്ധപ്പെട്ട വകുപ്പുകളുടെ സെക്രട്ടറിമാരും  ഇന്നലെ വിലയിരുത്തി.