ലഖ്‌നൗ:  ക്ഷീണിതനായ കുട്ടി മാതാവ് വലിച്ചുകൊണ്ടുപോവുന്ന സ്യൂട്ട്‌കെയ്‌സിന് മുകളില്‍ കിടന്നുറങ്ങുന്നു. സ്യൂട്ട്‌കെയ്‌സും കുഞ്ഞിനെയും വലിച്ചു നടക്കുന്ന മാതാവും വളരെയധികം ക്ഷീണിതയാണ്. ലോക്ക്ഡൗണിനെ തുടര്‍ന്ന് പട്ടിണിയിലകപ്പെട്ട് സ്വന്തം ഗ്രാമങ്ങളിലേക്ക് കാല്‍നടയായി യാത്ര പുറപ്പെട്ട കുടിയേറ്റ തൊഴിലാളികളുടെ ദുരിതം വെളിപ്പെടുത്തുന്ന  പുതിയ വിഡിയോ ആണ് ഇത്. 

 ഉത്തര്‍പ്രദേശിലെ ആഗ്രയിലെ ഹൈവേയില്‍ കുടിയേറ്റക്കാരുടെ സംഘം കടന്നുപോവുന്നതിനിടെയാണ് മാധ്യമ പ്രവര്‍ത്തകര്‍ ഈ ദൃശ്യം പകര്‍ത്തിയത്. കരളലിയിപ്പിക്കുന്ന ഈ ദൃശ്യം സോഷ്യല്‍ മീഡിയയില്‍ വൈറലായി. 

എവിടേക്കാണ് പോകുന്നതെന്ന് റിപ്പോര്‍ട്ടര്‍മാര്‍ ചോദിച്ചപ്പോള്‍, ഝാന്‍സി എന്നായിരുന്നു സ്ത്രീയുടെ മറുപടി. റിപ്പോര്‍ട്ടര്‍മാര്‍ മറ്റ് ചോദ്യങ്ങള്‍ ചോദിക്കുന്നുണ്ടെങ്കിലും അതിനു മറുപടി നല്‍കാന്‍ കഴിയാത്ത അത്രയും ക്ഷീണിതരായിരുന്നു സ്ത്രീയും സംഘത്തിലെ മറ്റുള്ളവരും.  പഞ്ചാബില്‍ നിന്നു 800 കിലോമീറ്റര്‍ അകലെയുള്ള ഝാന്‍സിയിലേക്കാണ് സംഘം കാല്‍നടയായി യാത്ര തിരിച്ചത്.