നാദാപുരം: ശുചീകരണത്തിന്റെ ഭാഗമായി നാദാപുരം പഞ്ചായത്തിന്റെ നേതൃത്വത്തില്‍ നീക്കം ചെയ്ത മാലിന്യങ്ങള്‍ തണ്ണീര്‍ത്തടത്തില്‍ തള്ളി.
കല്ലാച്ചി മാര്‍ക്കറ്റ് റോഡിലെ ഓടകളില്‍നിന്ന് നീക്കം ചെയ്ത ഖര മാലിന്യങ്ങളാണ് വാണിയൂര്‍ റോഡിലെ തണ്ണീര്‍ത്തടത്തില്‍ തള്ളിയത്.
തണ്ണീര്‍ത്തടം നികത്തുന്നതിനെതിരേ യുവജന സംഘടനകള്‍ സമരം നടത്തുന്നതിനിടെയാണ് പഞ്ചായത്ത് അധികൃതര്‍ തന്നെ മാലിന്യം തള്ളിയത്. തണ്ണീര്‍ത്തടത്തിന് സമീപത്തെ സി.പി.എം ഓഫീസിനടുത്തായുള്ള പാടശേഖരം നികത്താനുള്ള ഉടമയുടെ ശ്രമം കഴിഞ്ഞദിവസം യൂത്ത് ലീഗ് പ്രവര്‍ത്തകര്‍ തടഞ്ഞിരുന്നു. അതേസമയം മാലിന്യ സംസ്‌കരണത്തിന് സംവിധാനങ്ങള്‍ ഒരുക്കേണ്ട പഞ്ചായത്ത് തന്നെ മാലിന്യം പരസ്യമായി തള്ളിയതിനെതിരേ പ്രദേശത്ത് പ്രതിഷേധം ശക്തമായിട്ടുണ്ട്.