കുട്ടനാട്: ഹരിതഗീതം സ്വാശ്രയസംഘത്തിനെതിരെ കൂടുതല്‍ പരാതിക്കാര്‍ രംഗത്ത്.
വെളിയനാട് മാരമുറ്റം ലക്ഷംവീട്ടില്‍ സുകുമാരനാണ് തട്ടിപ്പു സംബന്ധിച്ച് ജില്ലാ പൊലീസ് മേധാവിക്ക് പരാതി നല്‍കിയത്. വാഹനമെടുക്കുന്നതിനു ജാമ്യം നില്‍ക്കുന്നതിനായി ചില രേഖകളില്‍ ഒപ്പിട്ടു വാങ്ങുകയും ഇതുപയോഗിച്ച് സന്തോഷ് വായപ് തട്ടിയെന്നുമാണ് പരാതി. ആലപ്പുഴ ഐ.ഒ.ബി. ബാങ്കില്‍ നിന്നും മുതലും പലിശയുമടക്കം 8.50 ലക്ഷം രൂപ അടയ്ക്കണമെന്നു കാട്ടി ജപ്തി നോട്ടീസ് കിട്ടിയപ്പോഴാണ് തട്ടിപ്പിനെപ്പറ്റി അറിയുന്നതെന്നും പരാതിയില്‍ പറയുന്നു. എസ്.എന്‍.ഡി.പി. യൂണിയന്‍ ഡയറക്ടര്‍ ബോര്‍ഡംഗം സന്തോഷ് അട്ടിയിലിനെതിരെയാണ് പരാതി നല്‍കിയിരിക്കുന്നത്.
പരാതിക്കാരനായ സുകുമാരനെ പ്രസിഡന്റായി കാണിച്ചും ആരോപണവിധേയനായ സന്തോഷിന്റെ ബന്ധുവിനെ സെക്രട്ടറിയായും കാട്ടിയാണ് സ്വയംസഹായസംഘം ഉണ്ടാക്കിയത്. വായ്പയെപ്പറ്റിയോ സ്വാശ്രയസംഘത്തെപ്പറ്റിയോ തനിക്കറിയില്ലെന്നും സുകുമാരന്‍ പറയുന്നു.