കൊല്ലം: കുടുംബാംഗങ്ങളുടെ അരാജക ജീവിതത്തെ തുടര്‍ന്ന് വീടിനുള്ളില്‍ അവഗണിക്കപ്പെടുന്ന മൈനറായ പെണ്‍കുട്ടികള്‍ക്കും ആണ്‍കുട്ടികള്‍ക്കും കുണ്ടറയില്‍ നടന്നതിന് സമാനമായ സംഭവങ്ങള്‍ ഉണ്ടാകാതിരിക്കാന്‍ തദ്ദേശ സ്വയം ഭരണസ്ഥാപനങ്ങളും സര്‍ക്കാരും കരുതല്‍ നടപടികള്‍ സ്വീകരിക്കണമെന്ന് സംസ്ഥാന മനുഷ്യാവകാശ കമ്മിഷന്‍.
സാമൂഹികക്ഷേമം, ശിശുക്ഷേമം,പൊലിസ് തുടങ്ങിയ സംവിധാനങ്ങളും ഗ്രാമസഭ,അയല്‍ക്കൂട്ടം തുടങ്ങിയവയും ബഹുജന-യുവജന പ്രസ്ഥാനങ്ങളുടെ സഹായത്തോടെ കുട്ടികള്‍ക്ക് സംരക്ഷണവും അഭയവും നല്‍കാന്‍ മുന്നിട്ടിറങ്ങണമെന്നും കമ്മിഷന്‍ അംഗം കെ. മോഹന്‍കുമാര്‍ ഉത്തരവില്‍ പറഞ്ഞു.
കേരളീയരെയാകമാനം അപമാനഭാരത്തിലാക്കുന്ന ഇത്തരം സംഭവങ്ങള്‍ ആവര്‍ത്തിക്കാതിരിക്കാന്‍ എല്ലാ ജനവിഭാഗങ്ങളും സംഘടനകളും സഹകരിക്കണമെന്നും ഉത്തരവില്‍ പറഞ്ഞു. കുടുംബാംഗങ്ങളുടെ അകല്‍ച്ചയും അരാജക ജീവിതവും കാരണമുണ്ടായ അരക്ഷിതാവസ്ഥയും അപമാനവും രണ്ട് പെണ്‍കുട്ടികള്‍ വര്‍ഷങ്ങളായി അനുഭവിക്കുകയായിരുന്നെന്ന് കമ്മിഷന്‍ കണ്ടെത്തി. പോക്‌സോ നിയമപ്രകാരമുള്ള സാന്ത്വന-സംരക്ഷണ നടപടികള്‍ എന്തുകൊണ്ട് കുണ്ടറയിലെ പെണ്‍കുട്ടികള്‍ക്ക് നല്‍കിയില്ലെന്ന് ജില്ലാ പൊലിസ് മേധാവി അന്വേഷിച്ച് റിപ്പോര്‍ട്ട് സമര്‍പ്പിക്കണമെന്നും കമ്മിഷന്‍ ഉത്തരവില്‍ ആവശ്യപ്പെട്ടു.