കൊച്ചി: മൊബൈല്‍ വരിക്കാരുടെ എണ്ണത്തില്‍ മികച്ച നേട്ടവുമായി ബി.എസ്.എന്‍.എല്‍. വരിക്കാരുടെ എണ്ണത്തിലും വരുമാനത്തിലും പോയ സാമ്പത്തിക വര്‍ഷം ബി.എസ്.എന്‍.എല്‍ മികച്ച നേട്ടമുണ്ടാക്കിയതായി എറണാകുളം പ്രിന്‍സിപ്പല്‍ ജനറല്‍ ജി. മുരളീധരന്‍ വാര്‍ത്താസമ്മേളനത്തില്‍ അറിയിച്ചു.
2,88,399 പുതിയ മൊബൈല്‍ വരിക്കാരെയാണ് കഴിഞ്ഞ വര്‍ഷം നേടിയത്. കഴിഞ്ഞ അഞ്ചു വര്‍ഷത്തിനിടെ റെക്കോഡ് നേട്ടമാണിത്. 20,978 ലാന്‍ഡ്‌ലൈന്‍ കണക്ഷനുകളും 22,801 ബ്രോഡ്ബാന്‍ഡ് കണക്ഷനുകളും ഇതിന് പുറമേ നല്‍കി. ആകെ 508 കോടി രൂപയുടെ വരുമാനമാണ് ഉണ്ടാക്കിയത്. മുന്‍ വര്‍ഷമിത് 500 കോടി രൂപയായിരുന്നു. ഇതുവഴി കേരളത്തിലെ സര്‍ക്കിളുകളില്‍ ഏറ്റവും നേട്ടം കൊയ്ത സര്‍ക്കിളെന്ന പദവി എറണാകുളം നിലനിര്‍ത്തി. കഴിഞ്ഞ മാസം മാത്രം 61,221 പുതിയ വരിക്കാരെ ചേര്‍ത്തതു വഴി മാര്‍ച്ച് മാസത്തിലെ കണക്ഷനുകളില്‍ രാജ്യത്ത് രണ്ടാമതെത്താനും കഴിഞ്ഞു. ഗുജറാത്തിലെ മെഹ്‌സാന ജില്ലയാണ് ഒന്നാമതെത്തിയത്.