ചാവക്കാട് : ഗുരുവായൂര്‍ എം.എല്‍.എ കെ.വി അബ്ദുല്‍ കാദര്‍ നാടിന്റെ വികസന കാര്യങ്ങളില്‍ സമ്പൂര്‍ണ പരാജയമാണെന്ന് മുസ്‌ലിം യൂത്ത്‌ലീഗ് ഗുരുവായൂര്‍ നിയോജക മണ്ഡലം കമ്മിറ്റി ആരോപിച്ചു.
ഗുരുവായൂരിലൂടെ കടന്ന് പോകുന്ന ദേശീയ പാതയുടേയും മണ്ഡലത്തിലെ സംസ്ഥാന പാതകളുടേയും ശോചനീയാവസ്ഥയിലും എം.എല്‍.എയുടെ നിസംഗതയിലും പ്രതിഷേധിച്ച് മുസ്‌ലിം യൂത്ത് ലീഗ് ഗുരുവായൂര്‍ നിയോജക മണ്ഡലം കമ്മിറ്റി ദേശീയ പാത ഉപരോധം ചെയ്തു കൊണ്ടാണ് ആരോപണം ഉന്നയിച്ചത്.
പന്ത്രണ്ട് വര്‍ഷത്തോളമായി അബ്ദുല്‍ കാദര്‍ മണ്ഡലത്തെ പ്രതിനിധീകരിക്കുന്നു, എന്നാല്‍ പുതിയതായി റോഡോ പാലമോ കൊണ്ട് വരാന്‍ അദ്ദേഹത്തിന് കഴിഞ്ഞിട്ടില്ല, ദേശീയ പാതയുടെ അറ്റാകുറ്റ പണികള്‍ ചെയ്യിപ്പിക്കുന്നതിന് വേണ്ട ഇടപെടലുകള്‍ നടത്താനോ വിവിധ വകുപ്പുകളെ ഏകോപിപ്പിച്ച് കൊണ്ട് വികസന പ്രവര്‍ത്തനങ്ങള്‍ മുന്നോട്ട് കൊണ്ട് പോകുവാനും അദ്ദേഹത്തിന് കഴിയുന്നില്ല.
യു.ഡി.എഫ് എം.എല്‍.എ ആയിരുന്ന പി.കെ.കെ ബാവ കൊണ്ടു വന്ന കരുവന്നൂര്‍ കുടിവെള്ള പദ്ധതി പോലും യഥാ സമയം പൂര്‍ത്തീകരിക്കുന്നതിലും അദ്ദേഹം വന്‍പരാജയമാണെന്നും യൂത്ത്‌ലീഗ് പറഞ്ഞു.
ഗുരുവായൂരിലെ ജനങ്ങള്‍ അദ്ദേഹത്തിനെ എം.എല്‍.എയാക്കിയത് റോഡുണ്ടാക്കാനാണെന്നും മറിച്ചു റോഡുകളെ തോടുകളാക്കി മാറ്റാനല്ലന്നും അബ്ദുള്‍ കാദര്‍ മനസ്സിലാക്കണമെന്നും യൂത്ത്‌ലീഗ് കൂട്ടിച്ചേര്‍ത്തു.
ചാവക്കാട് ദേശീയ പാതയില്‍ ഒറ്റതെങ്ങില്‍ നടത്തിയ ഉപരോധ സമരം മണ്ഡലം യൂത്ത്‌ലീഗ് പ്രസിഡന്റ് വി എം മനാഫ് ഉദ്ഘാടനം ചെയ്തു.
സമരക്കാരെ ചാവക്കാട് പൊലിസ് അറസ്റ്റ് ചെയ്തു നീക്കി.ഈ ഉപരോധ സമരം തീര്‍ത്തും സൂചന മാത്രമാണെന്നും റോഡിന്റെ ശോചനീയാവസ്ഥക്ക് ഉടന്‍ പരിഹാരം കണ്ടില്ലെങ്കില്‍ പി.ഡബ്ല.യു ഓഫിസ് മാര്‍ച്ച്, മണ്ഡലത്തിലെ വിവിധ കേന്ദ്രങ്ങളില്‍ ചക്ര സ്തംഭന സമരം, എം.എല്‍.എ ഓഫിസ് മാര്‍ച്ച് തുടങ്ങിയ സമര പരമ്പരകളുമായി രംഗത്ത് വരുമെന്നും യൂത്ത്‌ലീഗ് മണ്ഡലം കമ്മിറ്റി അധികാരികളെ ഓര്‍മിപ്പിച്ചു.
മണ്ഡലം യൂത്ത്‌ലീഗ് ട്രഷറര്‍ ഷജീര്‍ പുന്ന അധ്യക്ഷനായി.സമരത്തില്‍ യൂത്ത്‌ലീഗ് മണ്ഡലം ജനറല്‍ സെക്രട്ടറി എ.വി അലി മുഖ്യ പ്രഭാഷണം നിര്‍വഹിച്ചു.
മുസ്‌ലിംലീഗ് മുനിസിപ്പല്‍ പ്രസിഡന്റ് ജലീല്‍ വലിയകത്ത്, ജില്ലാ യൂത്ത്‌ലീഗ് സെക്രട്ടറി വി.പി മന്‍സൂര്‍ അലി, മണ്ഡലം ലീഗ് സെക്രട്ടറി ഫൈസല്‍ കാനാംപുള്ളി, പി.എച്ച് തൗഫീഖ്, എം.സി ഗഫൂര്‍, സുഹൈല്‍ തങ്ങള്‍, കെ.ബി റിയാസ്, സഖരിയ പാപ്പാളി, ഹനീഫ ഒരുമനയൂര്‍, ടി.ആര്‍ ഇബ്രാഹിം, അനസ് തിരുവത്ര, സഗീര്‍ ഒരുമനയൂര്‍, ആബിദ് അണ്ടത്തോട്, ആരിഫ് പാലയൂര്‍ സംസാരിച്ചു.
യൂത്ത്‌ലീഗ് മണ്ഡലം വൈസ് പ്രസിഡന്റ് നിഷാദ് മാളിയേക്കല്‍ സ്വാഗതവും സെക്രട്ടറി ഷാഫി എടക്കഴിയൂര്‍ നന്ദിയും പറഞ്ഞു.