പ്യോങ് യോങ്: മൂന്ന് തുടര്‍ തോല്‍വികള്‍ക്കൊടുവില്‍ ഇന്ത്യന്‍ വനിതാ ഫുട്‌ബോള്‍ ടീം വിജയം സ്വന്തമാക്കി. എ.എഫ്.സി ഏഷ്യന്‍ കപ്പ് യോഗ്യതാ പോരാട്ടത്തിന്റെ അവസാന ഗ്രൂപ്പ് മത്സരത്തില്‍ ഇന്ത്യ മറുപടിയില്ലാത്ത രണ്ടു ഗോളുകള്‍ക്ക് ഹോങ്കോങിനെ പരാജയപ്പടുത്തി. ആദ്യ പകുതി ഗോള്‍ രഹിതമായപ്പോള്‍ രണ്ടാം പകുതിയുടെ 68ാം മിനുട്ടില്‍ സസ്മിത മാലികും 70ാം മിനുട്ടില്‍ രതന്‍ബാല ദേവിയുമാണ് ഇന്ത്യക്കായി വല ചലിപ്പിച്ചത്.
ഗ്രൂപ്പ് ബിയില്‍ നാലില്‍ മൂന്നു മത്സരങ്ങളില്‍ തോല്‍വിയും ഒരേയൊരു വിജയവുമായി മൂന്നു പോയിന്റോടെ ഇന്ത്യയുടെ പോരാട്ടം അവസാനിച്ചു. ജയത്തോടെ അഞ്ചു ടീമുകളുള്ള ഗ്രൂപ്പില്‍ നാലാം സ്ഥാനത്തെത്താന്‍ മാത്രമാണ് ഇന്ത്യക്ക് സാധിച്ചത്. നേരത്തെ ആദ്യ മൂന്നു മത്സരങ്ങളില്‍ ഉത്തര കൊറിയ, ദക്ഷിണ കൊറിയ, ഉസ്‌ബെകിസ്ഥാന്‍ ടീമുകളോടു കനത്ത തോല്‍വി ഏറ്റുവാങ്ങി ഇന്ത്യ യോഗ്യത നേടാനാകാതെ പുറത്തായിരുന്നു.