വാഷിങ്ടണ്‍: ലോകം കൊവിഡ് മഹാമാരിയുടെ പ്രയാസമനുഭവിക്കുകയും വ്യാപാര, സാമ്പത്തിക മേഖല സ്തംഭിക്കുകയും ചെയ്ത അതേ സാഹചര്യത്തില്‍ തന്റെ രാജി പ്രഖ്യാപിച്ച് ലോക വ്യാപാര സംഘടനാ തലവന്‍.
ഡബ്ല്യൂ.ടി.ഒ ഡയരക്ടര്‍ ജനറല്‍ റോബര്‍ട്ടോ അസവിദോയാണ് തന്റെ സ്ഥാനത്തിന്റെ കാലാവധി തീരാന്‍ ഒരു വര്‍ഷം ബാക്കിനില്‍ക്കേ രാജി പ്രഖ്യാപിച്ചിരിക്കുന്നത്.
രാജിയുടെ കാരണം വ്യക്തിപരമാണെന്നാണ് ഔദ്യോഗിക വിശദീകരണമെങ്കിലും, അമേരിക്കന്‍ പ്രസിഡന്റ് ഡൊണാള്‍ഡ് ട്രംപുമായുള്ള അഭിപ്രായ ഭിന്നതയാണ് രാജിയിലേക്കു നയിച്ചതെന്നാണ് സൂചന. ലോക വ്യാപാര സംഘടനയ്‌ക്കെതിരേ ആരോപണങ്ങളുമായി നേരത്തെ ട്രംപ് രംഗത്തെത്തിയിരുന്നു. അമേരിക്കയെ സംഘടന വേണ്ടവിധം പരിഗണിക്കുന്നില്ലെന്നും ചൈനയെ ആവശ്യത്തിലധികം പരിഗണിക്കുന്നുവെന്നുമായിരുന്നു അദ്ദേഹത്തിന്റെ പ്രധാന ആരോപണം.
ഡബ്ല്യൂ.ടി.ഒയിലെ ഉന്നതര്‍ രാജിവച്ച് സംഘടനയില്‍ മാറ്റം വേണമെന്നും അല്ലാത്തപക്ഷം സംഘടനയുമായുള്ള ബന്ധം അമേരിക്ക വിച്ഛേദിക്കുമെന്നും അദ്ദേഹം ഭീഷണിപ്പെടുത്തുകയും ചെയ്തിരുന്നു.
യൂറോപ്യന്‍ യൂനിയനും ജപ്പാനടക്കമുള്ള ചില രാജ്യങ്ങളും സംഘടനയെ വിമര്‍ശിച്ചിരുന്നു. ഇതിനു പിന്നാലെയാണ് റോബര്‍ട്ടോ അസവിദോ രാജി പ്രഖ്യാപിച്ചിരിക്കുന്നത്. ഇദ്ദേഹം നേരത്തെ രണ്ടാം തവണയും ഡബ്ല്യൂ.ടി.ഒ തലവനായി തെരഞ്ഞെടുക്കപ്പെട്ടതായിരുന്നു.
കഴിഞ്ഞ ദിവസം നടന്ന സംഘടനയുടെ യോഗത്തിലായിരുന്നു അദ്ദേഹത്തിന്റെ രാജിപ്രഖ്യാപനം. ഡയരക്ടര്‍ ജനറലായ താന്‍ ഓഗസ്റ്റ് 31 മുതല്‍ പദവിയില്‍ തുടരില്ലെന്നാണ് അദ്ദേഹം വ്യക്തമാക്കിയിരിക്കുന്നത്.
62കാരനായ ഈ ബ്രസീലുകാരന് 2021 സെപ്റ്റംബര്‍ വരെ ഡബ്ല്യൂ.ടി.ഒ ഡയരക്ടര്‍ ജനറലായി കാലാവധിയുണ്ടായിരിക്കേയാണ് രാജി. രാജിക്കു കാരണം വ്യക്തിപരമാണെന്നാണ് അദ്ദേഹത്തിന്റെ വിശദീകരണം.