കോഴിക്കോട്: ട്രഷറി അക്കൗണ്ടില്‍ കെട്ടിക്കിടക്കാതെ അനുവദിച്ച ഫണ്ട് ചെലവഴിക്കാന്‍ യുവജന കമ്മിഷനോട് ധനവകുപ്പ്. പദ്ധതി ചെലവിനും ശമ്പളത്തിനുമായി പണം ആവശ്യപ്പെട്ട് യുവജന കമ്മിഷന്‍ സെക്രട്ടറി നല്‍കിയ അപേക്ഷയില്‍ തുക അനുവദിച്ചുകൊണ്ടുള്ള ഉത്തരവിലാണ് പദ്ധതികള്‍ ആസൂത്രണം ചെയ്ത് നടപ്പാക്കി യഥാര്‍ഥ ഗുണഭോക്തക്കളില്‍ പണം എത്തുമെന്നു ഉറപ്പു വരുത്താന്‍ ധനവകുപ്പ് ആവശ്യപ്പെടുന്നത്. അനുവദിച്ച പണം ട്രഷറി അക്കൗണ്ടില്‍ കിടക്കുന്ന സ്ഥിതി വരുത്തരുതെന്നും ഉത്തരവില്‍ നിര്‍ദേശിക്കുന്നുണ്ട്.
ഡി.വൈ.എഫ്.ഐ നേതാവ് ചിന്താ ജറോം അധ്യക്ഷയായ യുവജന കമ്മിഷന്‍ പദ്ധതികള്‍ക്കൊന്നും പണം ചെലവിടാതെ ശമ്പളത്തിനായി മാത്രം പണം പിന്‍വലിക്കുന്നത് നേരത്തെ വിവാദത്തിനിടയാക്കിയിരുന്നു. ബജറ്റില്‍ വകയിരുത്തുന്ന തുകയില്‍ ഏറെയും ഇതുവരെ യുവജന കമ്മിഷന്‍ ചെലവഴിച്ചിരുന്നില്ല.
കഴിഞ്ഞ സാമ്പത്തിക വര്‍ഷം യുവജന കമ്മിഷന് ഒരു കോടി 30 ലക്ഷം രൂപ ബജറ്റില്‍ വകയിരുത്തി 90 ലക്ഷം രൂപ അനുവദിച്ചുവെങ്കിലും ഇതില്‍ 39 ലക്ഷം രൂപയും ചെലവാക്കാതെ തിരിച്ചടച്ചിരുന്നു. എന്നാല്‍ ശമ്പളമായി 92.54 ലക്ഷം രൂപ ചെലവഴിക്കുകയും ചെയ്തു. 2017 സാമ്പത്തിക വര്‍ഷം 65 ലക്ഷം അനുവദിച്ചെങ്കിലും 19 ലക്ഷം ചെലവഴിക്കാതെ തിരിച്ചടച്ചിരുന്നു. ശമ്പളത്തിനായി നല്‍കിയ 87 ലക്ഷവും ചെലവഴിച്ചു.
2015-16 വര്‍ഷമാകട്ടെ ഒരു കോടി രൂപ ബജറ്റില്‍ നീക്കിവച്ചതില്‍ 70 ലക്ഷം അനുവദിച്ചപ്പോള്‍ 19.5 ലക്ഷ രൂപ ചെലവഴിക്കാതെ സര്‍ക്കാരിലേക്ക് തിരിച്ചടച്ചു. ആ വര്‍ഷവും 83.12 ലക്ഷം രൂപ ശമ്പളത്തിനായി ചെലവിട്ടു. ജീവനക്കാരുടെയും ഓഫിസിന്റെയും മറ്റു ചെലവുകള്‍ക്കായി 23 ലക്ഷം രൂപ കൂടി മൂന്നു വര്‍ഷങ്ങളിലായി യുവജന കമ്മിഷന്‍ ചെലവഴിച്ചിരുന്നു.
2018-19 സാമ്പത്തിക വര്‍ഷത്തില്‍ അനുവദിച്ച 1.30 കോടി രൂപയില്‍ നിന്ന് പദ്ധതി വിഹിതത്തില്‍ 40 ലക്ഷം രൂപയും ശമ്പള ഇനത്തില്‍ 40 ലക്ഷം രൂപയും മറ്റ് ചെലവിനത്തില്‍ അഞ്ച് ലക്ഷം രൂപയും അനുവദിക്കണമെന്നായിരുന്നു യുവജന കമ്മിഷന്‍ സെക്രട്ടറി ആവശ്യപ്പെട്ടിരുന്നത്.
ഇതിനെ തുടര്‍ന്ന് പദ്ധതി ഇനത്തില്‍ 50 ലക്ഷവും ശമ്പള ഇനത്തില്‍ 26 ലക്ഷവും മറ്റ് കാര്യങ്ങള്‍ക്ക് 3.80 ലക്ഷം രൂപയും ധനവകുപ്പ് അംഗീകരിച്ചു. റിലീസ് ചെയ്യുന്ന തുക ടി.എസ്.പി അക്കൗണ്ടില്‍ പാര്‍ക്ക് ചെയ്യരുതെന്നും യഥാര്‍ഥ ഗുണഭോക്താക്കള്‍ക്ക് തുക ലഭ്യമാക്കുന്ന തരത്തില്‍ റിലീസ് ചെയ്യേണ്ടതാണെന്നുമുള്ള നിബന്ധനക്ക് വിധേയമായിട്ടാണ് അനുമതി നല്‍കുന്നതെന്നും ഉത്തരവില്‍ പറയുന്നു.