കാസര്‍കോട്: കേരള കേന്ദ്ര സര്‍വകലാശാലയിലെ ബിരുദ-ബിരുദാനന്തര കോഴ്‌സുകളിലേക്ക് അഖിലേന്ത്യാ പ്രവേശന പരീക്ഷയുടെ റാങ്ക്‌ലിസ്റ്റ് അനുസരിച്ചുള്ള മൂന്നാംഘട്ട പ്രവേശനം നാളെ പെരിയയിലുള്ള കാംപസില്‍ നടക്കും. രാവിലെ 10 മുതല്‍12 വരെയാണ് രജിസ്‌ട്രേഷന്‍.
നിലവിലുള്ള സീറ്റുകള്‍ക്കു പുറമെ ഡിഫന്‍സ്, കാശ്മീരി അഭയാര്‍ഥികള്‍, വികലാംഗര്‍ എന്നിവര്‍ക്ക് അനുവദിച്ചിട്ടുള്ള സംവരണ സീറ്റുകളിലും അന്നേദിവസം തന്നെ പ്രവേശനം നടക്കും. അര്‍ഹത നേടിയ വിദ്യാര്‍ഥികള്‍ ഫീസും അസ്സല്‍ സര്‍ട്ടിഫിറ്റുകളും ബന്ധപ്പെട്ട രേഖകളുടെ സ്വയം സാക്ഷ്യപ്പെടുത്തിയ പകര്‍പ്പുകളുമായി എത്തിച്ചേരണം.
ബിരുദപ്രവേശനം തിരുവനന്തപുരം ക്യാപിറ്റല്‍ സെന്ററിലും എല്‍.എല്‍.എം കോഴ്‌സിനു പത്തിനംതിട്ട തിരുവല്ല കാംപസിലുമാണ് പ്രവേശനം നടക്കുന്നത്. വിശദ വിവരങ്ങള്‍ക്ക് സര്‍വകലാശാല വെബ്‌സൈറ്റ് സന്ദര്‍ശിക്കുക.