പേരാമ്പ്ര: റൂറല്‍ പൊലിസ് പരിധിയില്‍ വരുന്ന നാദാപുരം, വടകര, കുറ്റ്യാടി, പേരാമ്പ്ര, ഉള്ള്യേരി ഭാഗങ്ങളില്‍ സി.പി.എം നടത്തുന്ന ഭരണകൂട ഭീകരതയ്ക്ക് പൊലിസും സി.പി.എം നേതൃത്വവും സ്തുതി പാടുകയാണെന്ന് ഡി.സി.സി പ്രസിഡന്റ് അഡ്വ.ടി.സിദ്ദീഖ് വാര്‍ത്താ സമ്മേളനത്തില്‍ പറഞ്ഞു.
മേഖലകളില്‍ ഉണ്ടായിട്ടുള്ള വ്യാപക അക്രമങ്ങളില്‍ ഒരു ഭാഗത്ത് സി.പിഎം ആണ് മുഖ്യ പ്രതികള്‍ .
മേഖലയില്‍സമാധാനം ആഗ്രഹിക്കുന്ന ജനങ്ങളെ ഭീതിയിലാക്കി അക്രമം അഴിച്ചുവിടുകയാണ്. എല്ലാ ഭാഗത്തും ഉണ്ടാവുന്ന അക്രമങ്ങളില്‍ സി.പി.എം മുഖ്യ പ്രതികളാണ്. അണികള്‍ കൊഴിഞ്ഞു പോകുന്നതിലുളള വിദ്വേഷവും പകയും അക്രമത്തില്‍ കലാശിക്കുമ്പോള്‍ സംരക്ഷിക്കുന്നതും മൗനാനുവാദം നല്‍കുന്നതും പൊലിസാണ്. മിണ്ടാപ്രാണികളായ കോഴികളെ ചുട്ടെരിക്കുന്നതും ഗര്‍ഭിണികളായ സ്ത്രീകളുളള വീടാക്രമിക്കുന്നതും എന്ത് രാഷ്ട്രിയ മാന്യതയാണെന്ന് സി.പി.എം നേതൃത്വം മറുപടി പറയണം.
പണ്ട് കൂത്തുപറമ്പില്‍ പാപ്പിനിശേരി പാമ്പുവളര്‍ത്തല്‍ കേന്ദ്രത്തില്‍ പാമ്പുകളെയും മറ്റു മിണ്ടാപ്രാണികളെയും ചുട്ടെരിച്ച് നൃത്തം ചെയ്ത സംസ്‌ക്കാരത്തിന് ഒരു മാറ്റവും വന്നിട്ടില്ലെന്ന് സി.പി.എം ചേനോളിയില്‍ കോഴിഫാമിന് തീവെച്ച് നശിപ്പിച്ചതിലൂടെ തെളിയിച്ചിരിക്കുകയാണ്. ന്യൂനപക്ഷ സംരക്ഷകരുടെ റോളില്‍ രംഗത്ത് വരുന്ന സി.പി.എം പള്ളി ഇമാമിനെ ഭീഷണിപ്പെടുത്തി പറഞ്ഞയച്ചതും ലജ്ജാകരമാണ്.
ആക്രമണത്തിന് ഇരയായി വീടും സര്‍വ്വതും നശിച്ചവരെ പ്രതിപ്പട്ടികയില്‍ ചേര്‍ത്ത് കേസെടുത്തിരിക്കുകയാണ്. പേരാമ്പ്രയില്‍ ചേനോളിയിലും പരിസര പ്രദേശങ്ങളിലും സംഘര്‍ഷം നടന്ന സ്ഥലങ്ങള്‍ സന്ദര്‍ശിച്ച ശേഷം വാര്‍ത്താ സമ്മേളനം നടത്തുകയായിരുന്നു അദ്ദേഹം.
ഭരണ കൂട ഭീകരതക്കെതിരെ കോണ്‍ഗ്രസും യൂ ഡി എഫും പ്രതിരോധ പരിപാടികള്‍ നടത്താന്‍ ആലോചിച്ചു വരികയാണ്.
ഡി.സി.സി.ജനറല്‍ സെക്രട്ടറിമാരായ മുനീര്‍ എരവത്ത്, സത്യന്‍ കടിയങ്ങാട്, പി.വാസു മാസ്റ്റര്‍, ഇ അശോകന്‍ മാസ്റ്റര്‍, കെ.കെ.വിനോദന്‍, ബ്ലോക്ക് കോണ്‍ഗ്രസ് പ്രസിഡന്റ് രാജന്‍ മരുതേരി , മണ്ഡലം പ്രസിഡന്റ് പി.എം പ്രകാശന്‍ സംബന്ധിച്ചു.