കൊട്ടിയം: കണ്ണനല്ലൂര്‍ ടൗണില്‍ വൈദ്യുതി മുടക്കം പതിവാകുന്നതായി പരാതി.അറ്റകുറ്റപ്പണിക്കെന്ന പേരില്‍ ആഴ്ചയില്‍ ഒരുദിവസം ഉച്ചയ്ക്ക് 2 വരെ ടൗണിലെ മുഴുവന്‍ ലൈനുകളും ഓഫ് ചെയ്യുന്നതായാണ് പരാതി. പലപ്പോഴും മുന്‍കൂട്ടി അറിയിപ്പ് നല്‍കുക പോലും ചെയ്യാറില്ലെന്നു പ്രദേശവാസികള്‍ പറയുന്നു. സാധാരണ ഒരു ടൗണിലെ മുഴുവന്‍ ഭാഗത്തേക്കുമുള്ള ലൈനുകള്‍ ഇങ്ങനെ ഒന്നിച്ച് ഓഫ് ചെയ്യാറില്ല. ഇന്നലെയും സമാന സ്ഥിതിയില്‍ വൈദ്യുതി മുടങ്ങി.
തൃക്കോവില്‍വട്ടം ഗ്രാമപഞ്ചായത്തിലെ പ്രധാന വ്യാപാര വാണിജ്യ കേന്ദ്രമാണ് കണ്ണനല്ലൂര്‍. സ്‌കൂളുകളും മറ്റ് സര്‍ക്കാര്‍ ഓഫിസുകളും വ്യാപാരശാലകളുമടക്കം നിരവധി സ്ഥാപനങ്ങളാണ് ടൗണ്‍ പരിധിയില്‍ പ്രവര്‍ത്തിക്കുന്നത്. വൈദ്യുതി മുടക്കം ഇവിടെയുള്ളവരെ പ്രതിസന്ധിയിലാക്കുന്നുണ്ട്.
പത്രങ്ങളില്‍ കൂടി തെറ്റായ അറിയിപ്പ് നല്‍കുന്നതായും പരാതിയുണ്ട്. ഇതേപ്പറ്റി ഫോണ്‍ വിളിച്ചു പരാതിപ്പെട്ടാല്‍ മാന്യമായി മറുപടി നല്‍കാന്‍ പോലും അധികൃതര്‍ തയാറാകാറില്ലത്രേ. ഇതു സംബന്ധിച്ച് ഉന്നത അധികൃതര്‍ക്ക് പരാതി നല്‍കുമെന്ന് നാട്ടുകാരും വ്യാപാരികളും അറിയിച്ചു