മേപ്പാടി: കുന്നംമ്പറ്റയില്‍ കാട്ടാനയെ ഷോക്കേറ്റ് ചരിഞ്ഞ നിലയില്‍ കണ്ടെത്തി. കുന്നംമ്പറ്റ ആനന്ദ് എസ്റ്റേറ്റില്‍ സ്വകാര്യ റിസോര്‍ട്ടിന് സമീപമാണ് നാല് വയസ് പ്രായം കണക്കാക്കുന്ന കൊമ്പനാന ചരിഞ്ഞത്.
ആനക്കൂട്ടം കമുക് തള്ളിയിടുന്നതിനിടെ വൈദ്യുതി ലൈന്‍ പൊട്ടിവീഴുകയായിരുന്നു. ചതുപ്പില്‍ അകപ്പെട്ടതിനാല്‍ ആനയ്ക്ക് രക്ഷപെടാന്‍ കഴിഞ്ഞില്ല രാവിലെ റിസോര്‍ട്ടിലെ ജീവനക്കാരാണ് ആനയുടെ ജഡം കണ്ടത് വെറ്റിനറി സര്‍ജന്റെ നേതൃത്വത്തില്‍ പോസ്റ്റ് മാര്‍ട്ടം നടത്തി സംസ്‌കരിച്ചു.
ചെമ്പ്രയില്‍ നിന്നുമാണ് ഈ പ്രദേശത്തേക്ക് കാട്ടാന എത്തുന്നത് വനാതിര്‍ത്തിയില്‍ ഫെന്‍സിങ് ഇല്ലാത്തതാണ് കൃഷിയിടത്തേക്ക് ആന ഇറങ്ങുന്നത്. ചെമ്പ്രമലയുടെ താഴ്‌വാര പ്രദേശമായ കുന്നംമ്പറ്റയില്‍ സ്ഥിരമായി ആന ഇറങ്ങാറുണ്ട്. നാല് വര്‍ഷം മുന്‍പ് എരുമ കൊല്ലി സ്വദേശി ഹനീഫയെ ആന കുന്നംമ്പറ്റയില്‍ വെച്ച് കൊലപ്പെടുത്തിയിരുന്നു. വന്യമൃഗശല്ല്യത്തിന് പരിഹാരമാവാത്തതില്‍ പ്രതിഷേധിച്ച് സമരസമിതി രൂപീകരിച്ച് നാട്ടുകാര്‍ സമരമുഖത്തുണ്ട്. ഇതിനിടയിലാണ് ആന ഷോക്കേറ്റ് ചരിഞ്ഞത്.