പേരൂര്‍ക്കട: അന്യസംസ്ഥാന തൊഴിലാളിയെ ആക്രമിച്ച് പണവും മൊബൈല്‍ഫോണും കവര്‍ന്ന കേസിലെ പ്രതി റിമാന്‍ഡില്‍. വട്ടിയൂര്‍ക്കാവ് കൊടുങ്ങാനൂര്‍ മണല്‍പ്പുറം കെ.എം.ആര്‍.എ- 40 സജിതാ നിവാസില്‍ കള്ളന്‍ സുരേഷ് എന്നുവിളിക്കുന്ന സുരേഷ്‌കുമാര്‍ (32) ആണ് റിമാന്‍ഡിലായത്.
കഴിഞ്ഞ 7-ാം തീയതി രാത്രി 10.30ന് വട്ടിയൂര്‍ക്കാവ് തോപ്പുമുക്കിനു സമീപത്തായിരുന്നു സംഭവം. ഒറീസയിലെ രാംപൂര്‍ ഗോഡി പതാനാ സാഹി ജി.ഐ.പി ടൗണില്‍ മദാബാ പരീത യുടെ 2000 രൂപയും ഒരു മൊബൈല്‍ഫോണുമാണ് ഇയാള്‍ പിടിച്ചു പറിച്ചത്. റോഡിലൂടെ നടന്നുപോകുകയായിരുന്ന മദാബയുടെ സമീപം സ്‌കൂട്ടറിലെത്തിയ സുരേഷും ഇയാളുടെ ഒരു ബന്ധുവും ചേര്‍ന്നായിരുന്നു ആക്രമണം നടത്തിയത്.
ടിപ്പര്‍ലോറി മോഷ്ടിച്ചതിനും മണ്ണുകടത്തിയതിലും സുരേഷിനെതിരേ കരമന സ്റ്റേഷനിലും വട്ടിയൂര്‍ക്കാവ് സര്‍വ്വീസ് സഹകരണബാങ്കിനു സമീപത്തുവച്ച് സുഗതന്‍ എന്നയാളെ വെട്ടിപ്പരിക്കേല്‍പ്പിച്ചതിന് വട്ടിയൂര്‍ക്കാവ് സ്റ്റേഷനിലും ഇലിപ്പോടുള്ള ഒരു വീട്ടില്‍ ചന്ദനത്തടി കൊണ്ടിട്ട് ഗൃഹനാഥനെ കേസില്‍ കുടുക്കാന്‍ ശ്രമിച്ചതിന് ഫോറസ്റ്റിലും കേസുണ്ട്.