തിരുവനന്തപുരം: തെരഞ്ഞെടുപ്പ് പ്രചരണത്തിനായി അച്ചടിക്കുന്ന പോസ്റ്ററുകളിലും ലഘു ലേഖകളിലും മറ്റ് പ്രിന്റ് ചെയ്ത പ്രചാരണ സാമഗ്രികളിലും പ്രിന്റിംഗ് പ്രസിന്റെയും പബ്ലിഷറുടെയും പേരും വിലാസവും വ്യക്തമായി രേഖപ്പെടുത്തണമെന്ന് തെരഞ്ഞെടുപ്പ് കമ്മീഷന്‍ നിര്‍ദേശം നല്‍കി.

ഏതെങ്കിലും തരത്തിലുള്ള ചട്ട ലംഘനം ശ്രദ്ധയില്‍ പെട്ടാല്‍ പ്രസുകള്‍ക്കെതിരെ കര്‍ശന നടപടി ഉണ്ടാകും. 1951 ലെ ആര്‍.പി ആക്ട് 127എ വകുപ്പ് പ്രകാരമുള്ള നിര്‍ദേശങ്ങള്‍ പാലിക്കാത്ത പക്ഷം സ്ഥാപനത്തിന്റെ ലൈസന്‍സ് റദ്ദു ചെയ്യുന്നത് ഉള്‍പ്പെടെ നടപടിയെടുക്കുമെന്നും ജില്ലാ തെരഞ്ഞടുപ്പ് ഓഫീസര്‍ കൂടിയായ ജില്ലാ കലക്ടര്‍ അറിയിച്ചു.

വോട്ടര്‍ പട്ടികയില്‍ പേര് ഉറപ്പാക്കണം

തിരുവനന്തപുരം: ലോക്‌സഭാ തെരഞ്ഞെടുപ്പിന് മുന്നോടിയായി നടക്കുന്ന പ്രത്യേക വോട്ടര്‍പട്ടിക പുതുക്കലിന്റെ ഭാഗമായി 2019 ജനുവരി ഒന്നിന് 18 വയസ്സ് പൂര്‍ത്തിയായ, വോട്ടര്‍ പട്ടികയില്‍ പേര് ഇല്ലാത്തവര്‍ക്ക് പേര് ചേര്‍ക്കുന്നതിനും ലിസ്റ്റില്‍ തിരുത്തലുകള്‍ വരുത്തന്നതിനും ംംം.ി്‌ുെ.ശി എന്ന വെബ്‌സൈറ്റില്‍ അപേക്ഷിക്കാം. ഐ.ഡി കാര്‍ഡ് ഉളളവരും വോട്ടര്‍ പട്ടികയില്‍ പേര് ഉണ്ടെന്ന് ഉറപ്പ് വരുത്തണം. ഇതിനായി വെബ്‌സൈറ്റുകള്‍ പരിശോധിക്കാം. ഇത് സംബന്ധിച്ച് സംശയനിവാരണത്തിനായി വോട്ടേഴ്‌സ് ഹെല്‍പ് ലൈന്‍ ആയ 1950 എന്ന ടോള്‍ ഫീ നമ്പറിലേക്ക് വിളിക്കാം.