ഫറോക്ക്: രാമനാട്ടുകര പാറമ്മല്‍ രചന ക്ലബിനു സമീപത്തെ ഇരുനില വീട്ടില്‍ അഗ്നിബാധ. കാര്‍ത്തികയില്‍ മനന്തല രാമചന്ദ്രന്റെ വീട്ടിലാണ് തീപിടുത്തമുണ്ടായത്.
കഴിഞ്ഞദിവസം രാത്രി 11.30ന് വീടിന്റെ മുകള്‍നിലയിലെ കിടപ്പുമുറിയില്‍നിന്ന് ആളിപടര്‍ന്ന തീയില്‍ രണ്ടു കട്ടില്‍, കിടക്ക, കസേര, ഫാന്‍, തുണിത്തരങ്ങള്‍ എന്നിവയെല്ലാം കത്തിനശിച്ചു. ചൂടേറ്റ് മുറിയിലെ ജനല്‍ ചില്ലും തറയോടും പൊട്ടിത്തെറിച്ചു. അര്‍ധരാത്രി ജനല്‍ ചില്ല് പൊട്ടുന്ന ശബ്ദം കേട്ട് വീട്ടുകാര്‍ മുറി തുറന്നുനോക്കിയപ്പോഴാണ് തീ ആളിക്കത്തുന്നത് കണ്ടത്. വിവരമറിഞ്ഞെത്തിയ നാട്ടുകാരും അയല്‍ക്കാരും ചേര്‍ന്ന് തീ അണച്ചു.
കെ.എസ്.ഇ.ബി രാമനാട്ടുകര സെക്ഷന്‍ ജീവനക്കാരെത്തി വീട്ടില്‍ പരിശോധന നടത്തി. വൈദ്യുതി ഷോര്‍ട്ട് സര്‍ക്യൂട്ട് അല്ലെന്നാണ് പ്രാഥമിക നിഗമനം. അഗ്നിബാധ സംബന്ധിച്ച് ഇലക്ട്രിക്കല്‍ ഇന്‍സ്‌പെക്ടറേറ്റില്‍ റിപ്പോര്‍ട്ട് നല്‍കുമെന്ന് കെ.എസ്.ഇ.ബി അധികൃതര്‍ അറിയിച്ചു.