കോഴിക്കോട്: മുന്‍ തലമുറ നമുക്ക് വേണ്ടി കരുതിവച്ച കല്ലായിപ്പുഴയെ അടുത്ത തലമുറക്ക് വേണ്ടി സംരക്ഷിച്ച് നില നിര്‍ത്തുവാന്‍ കാലിക്കറ്റ് ഗേള്‍സ് വൊക്കേഷനല്‍ ഹയര്‍സെക്കന്‍ഡറി സ്‌കൂള്‍ എന്‍.എസ് എസ് ബോധവല്‍ക്കരണ പരിപാടിയില്‍ തീരുമാനിച്ചു.
മാലിന്യങ്ങള്‍ തള്ളിയും കൈയേറിയും നശിച്ചുകൊണ്ടിരിക്കുന്ന കല്ലായി പുഴയുടെ സംരക്ഷണത്തിന് വേണ്ടി പൊതുസമൂഹത്തിനുള്ള ബോധവല്‍ക്കരണവും പുഴ ശുചീകരണ പ്രവര്‍ത്തനങ്ങളും എന്‍.എസ്.എസിന്റെ നേതൃത്വത്തില്‍ സംഘടിപ്പിക്കും. വേനല്‍ മഴ ലഭിക്കുന്നതിന് മരങ്ങള്‍ നട്ടുവളര്‍ത്തുന്നതിന്റെ ആവശ്യകത സംബന്ധിച്ചും വിദ്യാര്‍ഥികളില്‍ ബോധവല്‍ക്കരണം നടത്തി.
എന്‍.എസ്.എസ് വളണ്ടിയര്‍മാര്‍ക്കുള്ള ബോധവല്‍ക്കരണ പരിപാടിയുടെ ഉദ്ഘാടനവും മരത്തൈകളുടെ വിതരണവും കോഴിക്കോട് ജില്ലാ പുഴ സംരക്ഷണ ഏകോപന സമിതി ജനറല്‍ സെക്രട്ടറി ഫൈസല്‍ പള്ളിക്കണ്ടി നിര്‍വഹിച്ചു.
പ്രിന്‍സിപ്പല്‍ എം. അബ്ദു അധ്യക്ഷനായി. പി.ടി.എ പ്രസിഡന്റ് പി. മുഹമ്മദ് മുസ്തഫ, എന്‍.എസ്.എസ് നോര്‍ത്ത് സിറ്റി ക്ലസ്റ്റര്‍ കണ്‍വീനര്‍ എം.കെ ഫൈസല്‍, എന്‍.വി അഷ്‌റഫ് സംസാരിച്ചു. എന്‍.എസ്.എസ് പ്രോഗ്രാം ഓഫിസര്‍ ഷൈജ പര്‍വീന്‍ സ്വാഗതവും വളണ്ടിയര്‍ സെക്രട്ടറി ഷാന മര്‍ഫി നന്ദിയും പറഞ്ഞു.