ആലപ്പുഴ: സംസ്ഥാനത്തെ ജില്ലാ സഹകരണബാങ്കുകള്‍ പിരിച്ചുവിട്ട സര്‍ക്കാര്‍ നടപടി അപലപനീയമാണെന്ന് ഡി സി സി പ്രസിഡന്റ് എം ലിജു പറഞ്ഞു. നോട്ട് പിന്‍വലിക്കല്‍ സമയത്ത് സഹകരണമേഖലയെ രാഷ്ട്രീയത്തിനതീതമായി ഒരുമിച്ച് നിര്‍ത്തുമെന്ന് പറഞ്ഞ സി.പി.എം ഇപ്പോള്‍ നടത്തിയത് ജനാധിപത്യത്തെ ഹനിക്കുന്ന നടപടിയാണ്.
സഹകരണ മേഖലയില്‍ പിന്തുണയില്ലാത്ത സര്‍ക്കാര്‍ കുറുക്കുവഴിയിലൂടെ ജില്ലാ സഹകരണ ബങ്കുകളുടെ ഭരണം പിടിച്ചെടുക്കാന്‍ ശ്രമിക്കുകയാണെന്നും ലിജു കുറ്റപ്പെടുത്തി. സഹകരണ ബാങ്കുകളുടെ ഭരണകാലാവധി കഴിയാന്‍ ഒരുവര്‍ഷം കൂടി ബാക്കി നില്‍ക്കെയാണ് സര്‍ക്കാരിന്റെ പ്രതികാര നടപടിയുണ്ടായിരിക്കുന്നത്.
സഹകരണ നിയമത്തിലെ 66-ാം വകുപ്പ് അനുസരിച്ച് നേരത്തെ പിരിച്ചു വിടാന്‍ സര്‍ക്കാര്‍ നടപടിയെടുത്തിരുന്നെങ്കിലും ഇതിന് ഹൈക്കോടതിയില്‍ നിന്നും തിരിച്ചടി നേരിട്ടതിന്റെ മോഹഭംഗമൂലമാണ് പ്രത്യേക ഭേദഗതിയിലൂടെ പിരിച്ചുവിടല്‍ നടത്തിയിരിക്കുന്നത്.
സര്‍ക്കാര്‍ നടപടിയ്‌ക്കെതിരെ നിയമപരമായും ജനങ്ങളെ അണിനിരത്തിയും പ്രതിരോധിക്കുമെന്ന് എം ലിജു പറഞ്ഞു.