കോഴിക്കോട്: സാഹിത്യലോകം നിലനില്‍ക്കുന്നത് ആസ്വാദകരുടെ പിന്തുണയിലാണെന്നും എഴുത്തുകാര്‍ വിജയിക്കുന്നുണ്ടെങ്കില്‍ അത് അവരുടെ കരുത്തിലാണെന്നും എം.ടി വാസുദേവന്‍ നായര്‍ പറഞ്ഞു. ഹരിതം ബുക്‌സ് സംഘടിപ്പിച്ച 'ദേശപ്പശിമ: യു.എ ഖാദറിന്റെ സാഹിത്യജീവിതം' പരിപാടിയുടെ സമാപന സമ്മേളം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ആസ്വാദകരുടെ മനസും കരുത്തും ആര്‍ജിച്ച എഴുത്തുകാരനാണ് യു.എ ഖാദര്‍. ദേശപരിമിതികള്‍ക്കപ്പുറത്ത് മാര്‍കേസ്, ഒക്ടാവിയോ പാസ് തുടങ്ങിയ ഇതിഹാസ എഴുത്തുകാരെ ലോകം വായിച്ചപോലെ യു.എ ഖാദറിനെയും വായനാലോകം അംഗീകരിക്കുകയാണ്. കഴിവുകള്‍ക്കുള്ളില്‍ നില്‍ക്കാതെ സമകാലിക ലോകത്തെ സമൂഹ്യചുറ്റുപാടുകളോടു പ്രതികരിക്കുന്നത് അദ്ദേഹത്തിന്റെ സവിശേഷതയാണെന്നും എ.ടി പറഞ്ഞു.
കഥാകൃത്ത് ശത്രുഘ്‌നന്‍ അധ്യക്ഷനായ ചടങ്ങില്‍ നടന്‍ മാമുക്കോയ മുഖ്യപ്രഭാഷണം നടത്തി. സാഹിത്യലോകത്തെ ശത്രുതകളും അഭിപ്രായ വ്യത്യാസങ്ങളും വായനക്കാര്‍ക്കു ബാധ്യതയാകരുതെന്ന് മാമുക്കോയ ഓര്‍മിപ്പിച്ചു. ശരത്ബാബു, പി.കെ പാറക്കടവ്, യു.എ ഖാദര്‍ സംബന്ധിച്ചു. ഹരിതം ബുക്‌സ് എഡിറ്റര്‍ പ്രതാപന്‍ തായാട്ട് സ്വാഗതവും കെ.വി സുഭാഷ് നന്ദിയും പറഞ്ഞു. രണ്ടു ദിവസങ്ങളിലായി നടന്ന സാഹിത്യസദസില്‍ വിവിധ സെഷനുകളില്‍ എം. മുകുന്ദന്‍, കെ.പി സുധീര, പ്രൊഫ. മുഹമ്മദ് അഹമ്മദ്, സോമന്‍ കടലൂര്‍, കബിത മുഖോപാധ്യായ, ചെലവൂര്‍ വേണു പങ്കെടുത്തു.
'ദേശപ്പശിമ: യു.എ ഖാദറിന്റെ സാഹിത്യജീവിതം' പരിപാടി സമാപിച്ചു