തിരുവനന്തപുരം: കുമ്മനം രാജശേഖരന്‍ തിരുവനന്തപുരത്ത് ബി.ജെ.പി സ്ഥാനാര്‍ഥിയാകുന്നത് തനിക്ക് വെല്ലുവിളിയാകില്ലെന്ന് ശശി തരൂര്‍ എം.പി. ഭൂരിപക്ഷം വര്‍ധിക്കുകയേ ചെയ്യുകയുള്ളൂ. അച്ഛാദിന്‍ വാഗ്ദാനം ചെയ്ത് അധികാരത്തില്‍വന്ന മോദി സര്‍ക്കാരിനാല്‍ വഞ്ചിതരായ ഇന്ത്യന്‍ ജനത ബി.ജെ.പിക്ക് വോട്ടുചെയ്യുമെന്ന് തോന്നുന്നില്ല.

രാജ്യത്തെ എല്ലാവിഭാഗം ജനങ്ങളും ബി.ജെ.പി ഭരണത്തില്‍ അസംതൃപ്തരാണ്. വര്‍ഗീയമായി ജനങ്ങളെ വിഭജിക്കാനാണ് കഴിഞ്ഞ അഞ്ചുവര്‍ഷത്തെ ഭരണത്തില്‍ ബി.ജെ.പി നടത്തിയത്. എല്ലാ അര്‍ഥത്തിലും ഇന്ത്യയെ നശിപ്പിച്ച ബി.ജെ.പി സഖ്യം അധികാരത്തില്‍ തിരിച്ചെത്തില്ലെന്ന് തനിക്ക് ഉറപ്പാണ്. തിരുവനന്തപുരത്തേക്ക് സംസ്ഥാനത്തുനിന്ന് മറ്റൊരാളുടെ പേരും പരിഗണിക്കാത്ത സാഹചര്യത്തിലാണ് താന്‍ തെരഞ്ഞെടുപ്പ് പ്രചാരണ പ്രവര്‍ത്തനങ്ങളിലേക്ക് കടന്നത്.

രാജ്യം ആര് ഭരിക്കണമെന്നും തന്റെ വികസനപ്രവര്‍ത്തനങ്ങളും നോക്കിയാകും ജനം വോട്ടുചെയ്യുക. ബി.ജെ.പി ഭരണത്തില്‍ 1.1 കോടി ആളുകള്‍ക്ക് തൊഴില്‍ നഷ്ടമായിരിക്കുകയാണ്. ശബരിമല വിഷയത്തില്‍ വിശ്വാസികള്‍ക്കൊപ്പം നിന്നെന്ന ബി.ജെ.പിയുടെ വാദം പൊള്ളയാണ്. പ്രശ്‌നത്തെ പാര്‍ട്ടി വളര്‍ത്താനുള്ള സുവര്‍ണാവസരമായി ഉപയോഗിക്കാനാണ് അവര്‍ ശ്രമിച്ചതെന്നും അദ്ദേഹം മാധ്യമപ്രവര്‍ത്തകരോട് പറഞ്ഞു.