മടിക്കേരി: കുടകില്‍ വേനല്‍ മഴയില്‍ വ്യാപകമായ നഷ്ടം. കഴിഞ്ഞ ഒരാഴ്ച്ചയായി ജില്ലയില്‍ വേനല്‍ മഴ തിമര്‍ത്തു പെയ്യുകയാണ്. ഇന്നലെ ഉണ്ടായ മഴയില്‍ ജില്ലയിലെ വിവിധഭാഗങ്ങളില്‍ കനത്ത നാശമുണ്ടായി. കഴിഞ്ഞ രണ്ട് ദിവസത്തില്‍ ജില്ലയില്‍ 50 ലക്ഷം രൂപയുടെ നാശനഷ്ടമാണ് കണക്കാക്കുന്നത്. സുണ്ടികൊപ്പയില്‍ കനത്ത കാറ്റിലും മഴത്തും ഒരു വീട് പൂര്‍ണമായും തകര്‍ന്നു. കുശാല്‍നഗര്‍, സിദ്ധാപുരം പാതയില്‍ പതിനഞ്ചോളം മരങ്ങള്‍ കടപുഴകി വീണു. പലയിടത്തും വൈദ്യൂതി തൂണുകള്‍ മുറിഞ്ഞു വീണു. സിദ്ധാപുരം, ചെട്ടള്ളി, പൊളിപേട്ട, കുശാല്‍നഗര്‍ ഭാഗങ്ങളില്‍ രണ്ട് ദിവസമായി വൈദ്യൂതി പൂര്‍ണമായും മുടങ്ങിയ അവസ്ഥയിലാണ്. പലയിടത്തും വ്യാപകമായ കൃഷി നാശവും സംഭവിച്ചു.