തൃശൂര്‍: അഖിലേന്ത്യ മത്സ്യത്തൊഴിലാളി കോണ്‍ഗ്രസ് ദേശീയ കമ്മിറ്റി സംഘടിപ്പിക്കുന്ന നാഷനല്‍ ഫിഷര്‍മെന്‍ പാര്‍ലമെന്റ് 14ന് തൃപ്രയാര്‍ ഇന്‍ഡോര്‍ സ്റ്റേഡിയത്തില്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി ഉദ്ഘാടനം ചെയ്യും.

രാജ്യത്തെ മുഴുവന്‍ സംസ്ഥാനങ്ങളില്‍നിന്നും, ഏഴ് കേന്ദ്ര ഭരണ പ്രദേശങ്ങളില്‍ നിന്നുമായി 543 പ്രതിനിധികള്‍ പരിപാടിയില്‍ പങ്കെടുക്കും. ഇന്ത്യയില്‍ ആദ്യമായാണ് മുഖ്യധാര രാഷ്ട്രീയ പാര്‍ട്ടിയുടെ നേതൃത്വത്തില്‍ മത്സ്യത്തൊഴിലാളികളുടെ അവകാശങ്ങളും പ്രശ്‌നങ്ങളും ചര്‍ച്ചചെയ്യാന്‍ പാര്‍ലമെന്റ് സംഘടിപ്പിക്കുന്നതെന്ന് ദേശീയ പ്രസിഡന്റ് ടി.എന്‍ പ്രതാപന്‍ വാര്‍ത്താസമ്മേളനത്തില്‍ പറഞ്ഞു. മത്സ്യത്തൊഴിലാളികളുടെ വിവിധ പ്രശ്‌നങ്ങള്‍ പാര്‍ലമെന്റ് ചര്‍ച്ച ചെയ്യും. കേരളത്തിലെ വിവിധ മത്സ്യത്തൊഴിലാളി സംഘടനകളുടെ പ്രതിനിധികളും ഉള്‍പ്പെടെ മൂവായിരത്തോളം പേര്‍ പാര്‍ലമെന്റില്‍ പങ്കെടുക്കുമെന്നും അദ്ദേഹം പറഞ്ഞു.

ഡി.സി.സി വൈസ് പ്രസിഡന്റ് ജോസ് വള്ളൂര്‍, മത്സ്യത്തൊഴിലാളി കോണ്‍ഗ്രസ് സംസ്ഥാന പ്രസിഡന്റ് ആസ്റ്റിന്‍ ഗോമസ്, വൈസ് പ്രസിഡന്റ് എ.എം അലാവുദ്ദീന്‍ പങ്കെടുത്തു.